Үхлийг өөрийн биеэр мэдрэх боломжтой ер бусын тоглоом наадгай Шанхай хотод нээгдсэн байна. Хэрэв та хүсвэл нөгөө ертөнцөд очиж байгаа үйл явцаа үзэж, чандарлуулж, дахин төрж буйгаа харах болно. Энэ айдсыг мэдрэхэд 68 долларын хөлс төлөх юм. Үхэхээсээ өмнө хүмүүс гэрээслэл маягийн юм бичээд дараа нь түүнийгээ дурсгал болгон авах боломжтой. Энэ шинэ зугаацлыг сонирхох хүмүүс мундахгүй байгаа аж. “Маш сонин мэдрэмж. Тайвширч, энэ бүх ширүүн хэмнэлтэй амьдралаас түр ч болов салж, амьдралын чухал асуудлуудын талаар бодох боломжийг олгодог юм” гэж нэгэн үйлчлүүлэгч ярьжээ.

“Тэр бүх хаалгаар орсны дараа оюун санаанд өөрчлөлтүүд гардаг юм билээ. Бүх үйл явц дууссаны дараа чи огт өөр хүн болчихсон гарч ирнэ. Их дажгүй юм. Хүмүүс үүнийг мэдрэх хэрэгтэй” хэмээн өөр нэг хүн өгүүлэв. Энэхүү наадгайг бий болгосон хүн хүмүүст үхэлд бэлтгэлтэй байхад нь туслахын тулд түүнийг нээсэн гэдгээ онцлов. Тэрбээр хүмүүс үхэхдээ чухам ямар үг хэлэх вэ гэдэг талаараа маш ховор боддог гэдгийг хэлжээ. Энэ наадгайгаар ороод үзсэн хүн үхлээс айхгүй, түүнд бэлтгэлтэй байх аж.