Домогт усан сэлэгч Майкл Фелпс Риогийн олимпийн наадмаас 5 алт, 1 мөнгөн медаль хүртлээ. Тэрээр 4х100 метрийн буухиад түрүүлснийхээ дараа тамирчны замналаа яг ингэж өндөрлүүлэхийг хүссэн тухайгаа ярьжээ.

"Сүүлчийн удаа бие халаалтаа хийж, сүүлчийн удаа уралдааны замд гарахаар алхаж, сүүлчийн удаа элэг нэгтнүүдийнхээ өмнө гарч замналаа өндөрлүүлэхийг би хүсч байна. Миний сүүлчийн гараа гэдгийг би мэдэж байсан болохоор багийнхаа залуустай хамт уралдааны замд  гарах хэчнээн гайхалтай сайхан байгааг хэлсэн. Миний мөрөөдөл биелэсэн. Замналынхаа төгсгөлд яг л бялуун дээрх чимэглэл шиг алтан медаль хүртэхийн би хүссэн" гэж Фелпс өгүүлжээ.

Майкл Фелпс ийнхүү Олимпийн наадмын 23 алтан медаль, 3 мөнгө, 2 хүрэл медальтайгаар тамирчны замналаа өндөрлүүлж байна.

Тэрбээр 2008 оны Бээжингийн олимпийн наадамд оролцсон төрөл бүртээ аваргын алтан медаль хүртэж, нэг олимпоос 8 алтан медаль хүртсэн гайхалтай амжилтын эзэн болж байсан юм. Майкл Фелпс ийн 26 медаль авснаар хуучин Зөвлөлт Холбоот улсын нэрт гимнастикч Лариса Латынинагийн олимпийн наадмаас 18 медаль хүртсэн амжилтыг эвдсэн. Олимпийн хамгийн олон медальтай тамирчин Майкл Фелпс дэлхийн дээд амжилтыг олон удаа эвдэж байсан. Хувийн төрөлд 29 удаа, буухиа төрөлд 10 удаа рекорд тогтоогоод байна.  Өдгөө дэлхийн 7 дээд амжилтыг эзэмшиж байгаа юм.  

Тэрбээр 15 настайдаа анхныхаа олимпид оролцож байжээ. Өдгөө 31 настай Майкл Фелпс тав дахь удаагаа олимпид оролцох эрхээ авч "Рио-2016" олимпийн нээлтийн ажиллагаанд АНУ-ын тугийг барьж алхсан билээ.