Зуны улирал эхэлж загас барих хорхойтой эрчүүд бид уурга дэгээгээ бэлтгэж, амралт зугаалганд явахаар бэлтгэж байгаа энэ үед бас загас барих зөвшөөрөл хаанаас, ямар газраас авахаа мэдэхгүй байгаа бол энэ мэдээлэл танд туслана гэж найдаж байна. 2016 оны сүүлээс эхлэн Дэлхийн байгаль хамгаалах сангийн Монгол дахь хөтөлбөрийн газрын санаачилгаар Байгаль орчин, аялал жуулчлалын яам,  Хэнтий аймгийн БОАЖГ, тус аймгийн Дадал, Норовлин, Баян-Адрага, Биндэр, Батширээт сумдын Засаг даргын тамгын газар, Онон голын загас агнуурын бүс нутгийн менежментийг хариуцагч “Онон голын загасчдын клуб” хамтран туршилтаар Загас барих тусгай зөвшөөрлийг цахимаар авах сайхан боломжийг олгож эхэлжээ. Гэхдээ энэ нь ганц далайлтаар хийх ажил биш учраас энэ удаа зөвхөн Хэнтий аймгийн нутаг дахь Онон голд туршиж байна. Хэрвээ амжилттай болбол улс орон даяар хэрэгжүүлэх юм байна. Тэгэхээр та  Онон голоос загас барих зөвшөөрлийг ezagas.mn веб хуудсанд орж авах боломжтой бөгөөд нэг зөвшөөрөл нь 3 хоногийн хугацаанд хүчинтэй, 10 ширхэгээс илүүгүй загас барих эрх олгоно. Загас барих зөвшөөрлийн бичгийн үйлчилгээний хураамж нь 10 мянган төгрөг. Дээр нь загасны төлбөр нэмэгдэнэ.  IOS болон Android үйлдлийн системтэй гар утастай хүмүүс www.ezagas.mn руу ороод эдгээрт зориулж боловсруулсан апликейшнийг үнэгүй татаж авч болно. Та бүхэн ezagas мобайл аппликейшн ашиглан зөвшөөрлөө авах, бас шалгах боломжтой. Мөн өөрийн зөвшөөрлийн талаарх мэдээллийг g-mobile гар утаснаас 131516 тусгай дугаарт энгийн тарифаар мессеж бичиж авч болно.Түүнчлэн анхаарах ёстой нэг зүйл бий. Та барьсан загасныхаа био мониторингийн мэдээллийг заавал оруулах ёстой. Учир нь, таны оруулсан мэдээлэл цаашид загасны зүй зохистой ашиглалтын хэмжээг тогтооход ач холбогдолтой суурь мэдээллийг бүрдүүлэхэд нэмэр болох юм. Тэгэхээр та цаг зав гаргаж мэдээллээ бүрэн оруулаарай.www.ezagas.mn зөвхөн зөвшөөрөл өгдөг веб хуудас биш. Энд загас, загасчлалтай холбоотой олон мэдээлэл бий. 

Эх сурвалж: http://unuudur.mn/article/91028

zagaschlah_sport.jpg

 

profile