Чихрийн нэгдүгээр төрлийн шижин өвчтэй хүүхдүүд биеийн идэвхтэй байдалд оршиж, аль болох их явж байхыг Австралийн эрдэмтэд зөвлөв. Аделаидын их сургуулийн эрдэмтэд чихрийн шижин өвчтэй бяцхан өвчтөнүүдийн зүрх, судасны системийн байдлыг сайжруулахын тулд өдөрт 1000 алхам илүү хийж байх хэрэгтэй гэсэн дүгнэлтэд хүрчээ.

Тэд судалгаандаа нэгдүгээр төрлийн чихрийн шижин өвчтэй 90 хүүхдийг оролцуулсан байна. Ингээд хүүхэд бүрийн биеийн идэвхтэй байдлыг өдөр бүр дүгнэж, тэдний эрүүл мэндийн байдлыг тогтоож байв. Тэгтэл хүүхдүүдийн 55 хувь нь өдөрт 10 мянгаас бага алхмыг хийж байсан гэнэ. Тэдний дийлэнхид нь мартамхай болох шинж тэмдгүүд илэрч байсан аж. Энэ нь бага насны хүүхдүүдэд тэр бүр тохиолдоод байдаг зүйл биш юм. Харин 10 мянгаас дээш алхам хийж, амьдралын идэвхтэй хэв маягийг дагаж байсан хүүхдүүдийн биеийн байдал харьцангуй дээр байжээ.

Тиймээс эрдэмтэд өдөрт нэмж 1000 алхам илүү явж байвал зүрх, судасны тогтолцооны байдал сайжирч, цаашдаа эрүүл мэндэд ямар нэгэн асуудал үүсэхгүй байх боломжтой гэдэгт итгэлтэй байгаа юм. Дээр нь илүү их хөдөлж байсан хүүхдүүдийн биеийн жин болон цусны даралт багасаж байсан гэнэ. Ийнхүү эрдэмтэд өдөр тутам хийж байгаа алхам болон чихрийн нэгдүгээр төрлийн шижин өвчтэй хүүхдүүдийн эрүүл мэндийн байдал зэргийн хамаарал ямар байдгийг анхлан тогтоожээ. Судлаачид эцэг, эхчүүд болон эмч нар хүүхдүүдийн биеийн идэвхтэй байдалд аль болох анхаарлаа хандуулах ёстой хэмээн үзэв.