Хөлд эвтэйхэн биеийн тамирын шаахай углаад гадаа гарч гүйснээр эрүүл мэндээ сайжруулах анхны алхмыг хийж байна хэмээн олон хүн боддог. Тэгвэл байнга гүйж эхэлдэг хүмүүсийн тал нь тун ч удалгүй бэртэл, гэмтэл авдаг гэнэ. Тэдний дийлэнх нь гоё сайхан харагдсан пүүзийг худалдаж аваад өмссөнөөрөө хөлд эвтэйхэн бус, хөлийн тавхайд ачаалал өгдөг шаахайтай болж байгаа гэдгээ мэддэггүй аж.

Их Британийн нэгэн коллежийн судлаачид ийм дүгнэлтэд хүрсэн байна. Гүйх дуртай хүмүүс жилийн 26 өдрийг бэртэл, гэмтэлтэй өнгөрүүлдэг гэдгийг судалгаа харуулав. Хөлийн өвдөлтөө тоохгүй, хайнга хандах нь гүйлтээр хичээллэж байгаа хүмүүсийн 13 хувийг энэ дуршлаасаа арга буюу татгалзахад хүргэдэг гэнэ. Учир нь, тэдний өвдөлт улам ихэсдэг юм. Гэвч дийлэнх хүмүүс гүйхээ үргэлжлүүлдэг аж. Ингэснээр мэдрэлийн судас, өвдөг, булчин шөрмөсийн суналт зэрэг бэртлүүдийг нэмж авах аюултай хэмээн шинжээчид анхааруулж байна.

Санал асуулгад оролцсон хүмүүсийн гуравны хоёр нь элэгдэж, муудах хүртэл нь гүйлтийн шаахайгаа солих тухай боддоггүй хэмээн өгүүлжээ. Хэдий хөл нь өвдөж байгаа ч гэсэн бараг тэн хагас нь хөлд эвтэйхэн бус шаахай өмсдөг гэдгээ хүлээн зөвшөөрөв. Долоон хүний нэг нь гоё, донжлог хэлбэр, төрхтэй гутлаа хэдий өвдөлт мэдрүүлж байгаа ч гэсэн солихоос татгалздаг гэнэ.

Мөн гүйгчдийн долоон хувь нь тун ч дэгжин брэндийнх учраас тэдгээр шаахайгаа хаяхгүй хадгалдаг аж. Ийм гүйгчид тавхай, хөл зэрэгтээ бэртэл, гэмтэл учруулах өндөр магадлалтайгаас гадна ууц нуруундаа архаг хууч өвчтэй болох аюултай гэж мэргэжилтнүүд онцлов. Тиймээс гүйлтээр хичээллэж эхлэхээсээ өмнө загварлаг бус харин хөлд эвтэйхэн, өөрт чинь тохирсон шаахайг сонгож авах нь чухал юм.