Өмнөд Солонгосын хил дээр Монголоо өмөөрөхүй

by СолонгосМэдээ posted Jun 26, 2019
?

Shortcut

PrevӨмнөх Бичлэг

NextДараах Бичлэг

ESCХаах

Larger Font Smaller Font Дээш Доош Go comment Хэвлэх

1773_2276_1557.jpg

Өнгөрсөн 2017 оны 2 дугаар сард Монголын Залуучуудын холбоо болон БНСУ-аас Монгол улсад суух Элчин сайдын яамны хамтын ажиллагааны хүрээнд  МЗХ-ны байранд Солонгосын мэдээллийн төв”-ийг нээн ажиллуулж эхлэхэд тус төвийн үйл ажиллагаанд хамгийн түрүүнд сэтгэгдлээ бичсэн Shijrwe фейсбүүк хэрэглэгчийн энэхүү нийтлэл одоог хүртэл үнэ цэнэтэй байгаа болов уу гэдэг үүднээс та бүхэндээ толилуулж байна.

Өнөөгийн байдлаар БНСУ-ын визийг ямар их бэрхшээл туулан байж авдаг болон тус улсын хилээр нэвтрэх нь үнэндээ “Тэр өдрийн тэнгэр мэдсэн хэрэг” болоод байгаа нь дан ганц бидний аз бус тэнд ажиллаж буй цагаачлалын албаны ажилтны гарын үзүүрээр шийдэгдэж байгаатай маргах хүн гарахгүй биз ээ. 

20130730102617823660.jpg

   Shijrwe 2017/02/09 ӨДӨР. ТЭРЭЭР Хамгийн түрүүнд хийх ажил чинь шүү!!! ГЭЖ ЭХЛЭЭД “Монголоо өмөөрөхүй. Солонгосын хил дээр" ХЭМЭЭН ГАРЧИГЛАЖЭЭ.

 

   Монгол хүн л агуу, хөх толботой, дэлхийд хосгүй үндэстэн гэж би гадныханд гайхуулдаггүй. Гэхдээ Монгол гэдэг ядуу буурай орны иргэн учраас тэдэнтэй хүний эрхийг нь хүндэтгэхгүй харьцаж болно гэж үздэг гадныханд би дургүй. Гэхдээ тийм хүмүүстэй маш цөөхөн таарч байсан.

   Гэрээсээ гараад хэд хонохдоо олон орны хүмүүстэй уулзаж хүнлэг сэтгэлийн тус, эeлдэг занд нь баясаж, тэдний ихэнхийг нь хувьд анх уулзсан Монгол хүн нь байсан учраас тэдэнд эх орныхоо тухай аятайхан сэтгэгдэл төрүүлөхийг хичээж явлаа. Монголыг маань мэдэхгүй хүн олон байсан ч муулах хүнтэй таараагүйдээ баярлаж байлаа.

00501360_20180507.jpg

   Харин Өмнөд Солонгосын хил дээр ирээд Монгол хүмүүсийг төрөлх хэлээрээ хоорондоо ярихыг хориглодог, биднийг хүн гэж тоож үздэггүй, үгийг нь сонсоогүй байж нутгийнхаа захаас хөөдөг түшмэлтэй таараад цочирдлоо. Би хаа явсан газраа аль чадахаараа Монгол хүндээ туслахыг боддог. Харин өнөөдөр санаа бодлоо илэрхийлэх, шударга зөвөөр хэрэг явдлаа шийдүүлэх хүний эрхийг нь бүдүүлгээр зөрчсөн олиггүй түшмэлээс болоод Солонгосын хил дээр баригдаад үлдсэн 4 Монгол залуу, нэг бүсгүйд сэтгэлийг нь засах ганц аятайхан үг ч хэлж чадаагүйдээ харамсаад л сууж байна. Өрөөндөө биднийг хүнээр хүргүүлж аваачсан хилийн албаны ихэмсэг ажилтан Монголоор байтугай дэлхийн хэл англиар ярьдаггүй мөртлөө өрөөнд нь аваачсан хүмүүсийг хилээрээ оруулах оруулахгүйг шийддэг нь утгагүй санагдав.

   Би Америкаас гараад Японоор дамжаад тувт Америкийн United Airlines гэдэг онгоцоор Инчон дээр ирсэн. Эх орныхоо эдийн засгийг дэмжих зорилгоор маргааш нь МИАТ-ийн нислэгээр буцах тийзтэй. Хүлээх хугацаа нь дамжин өнгөрөх 6 цагийн нормоос хэтэрч 15 цаг болох учраас заавал хил гарч ачаагаа аваад дахин орж бүртгүүлээрэй гэж Америкийн талаас хэлсэн юм. Амeрикийн визтэй учраас Солонгосоор дамжин өнгөрөх нь асуудалгүй гэсэн учраас Сөүл хотод нэг хонох буудал ч захиалсан байв. Гэтэл хил дээр гаргасангүй, хилийн албаны шийдвэр гаргадаг хүний өрөөнд аваачсан нь тэр.

20170104_125602.jpg

   Англиар ярьдаггүй түшмэл хэл нэвтрэхгүй болохоороо ашгүй англиар ярьдаг хүн дуудаж ирүүллээ. Тэгэхдээ л тэр хүн биднийг хилээр оруулахгүй гэдэг нь биeийн хэлээс нь анхнаасаа харагдаж байсан л даа. Америкийн визтэй бас дараачийн нислэгээр явах нь тодорхой байхад яагаад оруулахгүй байгааг нь л мэдмээр байснаа орчуулагчаар нь дамжуулж асуулаа. Гэтэл Америкаас шууд ирсэн бол гаргаж болох байсан, харин Японоор дайрсан учраас гаргахгүй гэсэн тайлбар өгсөн нь ямар ч логик үндэслэлгүй байгаа биз.

   Биднийг тэр өрөөнд байх үeэр Монголоос онгоц ирж таараад хилээр гаргахгүй хүмүүсийг нэмж авчирч байсан. Айж түгшсэн царайтай хэл мэдэхгүй тэд маань аврал эрсэн харцаар хараад сэтгэл өвдмөөр. Тэгээд сэтгэлийг нь засах нэг үг хэлэх гэхээр л түшмэл гуай дуугай бай гээд байх нь зовлонтой байсан.

92815.jpg

   Орчуулагч залуу "Энэ хүний дургүйг хүргэвэл та нар баривчлагдаж ч болно. Тэгэхээр дуугүй байгаарай. Please" гэнэ. Түүнээс манай хүмүүсийн учир шалтгааныг энэ даргадаа орчуулаад өгөөч гэхээр "Би зөвхөн англиар ярьдаг хүмүүсийг л орчуулдаг. Дамжуулж орчуулах нь миний үүрэг биш" гэсэн. Ингээд орчуулагч бидний ачаа тээшийг гаднаас олж ирүүлсний дараа шууд дотогш буцааж оруулсан. Захиалаад үнийг нь төлсөн буудалдаа биш онгоц буудалны сандал дээр унтах болсон би дотор үлдсэн Монгол хүмүүсээ бодохоор өрөвдөх, хэдхэн Монгол хүнээ ажил хөдөлмөрөөр хангаж чадахгүй хүний нутагт хөлсний ажил хийх гэж хөөгдөж туугдах зовлонд унагасан төр засагтаа гомдох сэтгэл төрөөд сууж байна даа.

   Бас Солонгосын элчин сайдын яам гэдэг өөрийнх нь төрийн байгууллага барьцаа хөрөнгө, баталгаа гээд баахан юм шаардаж төлбөр мөнгийг нь авч виз олгочихоод байхад энд ганцхан жижиг түшмэл ирсэн хүнээс өөрөөс нь нэг ч үг асуулгүй хилээрээ оруулахгүй гээд баривчлаад буцаах нь бүр ч гажгийг гайхаад барахгүй юм. Монгол хүн Монголдоо ажил хөдөлмөр эрхлээд, хүний нутагт хөлс хүчээ үнэлэх гэж хөөгдөж доромжлуулж байхын гашуун зовлонгоос хэзээ салах вэ? Солонгос улсын хилийн ажилтан өөрийн элчин сайдын яамнаас авсан визийн зөвшөөрлөө хил дээрээ цуцалж Монголчуудыг хохироохоо хэзээ болих вэ?

출입국관리사무소_입국심사장면.jpg

   Монгол хүн бүрт НҮБ-ийн Хүний эрхийн түгээмэл тунхаглалд туссан хүний зайлшгүй эдлэх ёстой нийтлэг эрхүүд хамааралтайг энэ тунхаглалын гишүүн Солонгос улсын хилийн ажилтнуудад хэн ойлгуулах вэ гээд л олон асуудал байгааг олж харлаа. Солонгост амьдардаг, эсвэл тэдэнтэй ажилладаг, нөхөрлөдөг хүмүүс байвал эдгээр асуудлыг олон нийтэд нь хүргэж өгөөрэй.

   Хүний эрхийг хүндэтгэдэг, төр засгийнхаа буруутай үйлдлийг зоригтой гаргаж тавьдаг Солонгос хүмүүс олон байгаа. Тэд манай иргэдийн эрх ашгийн төлөө ухамсар дорой, төрийн ажлаа өөрийн үзэмжээр шийддэг өчүүхөн түшмэдүүддээ нөлөөлж чадна гэж бодож байна.

download.jpg

 

WWW.MGLRADIO.COM

 

Солонгос мэдээ булан  


Articles

1 2 3 4 5 6 7 8 9 10