Заавал үзэх хэрэгтэй Өмнөд Солонгосын долоон кино

by СолонгосМэдээ posted Jul 03, 2019
?

Shortcut

PrevӨмнөх Бичлэг

NextДараах Бичлэг

ESCХаах

Larger Font Smaller Font Дээш Доош Go comment Хэвлэх

60881401_2420416881312567_2008575162877739008_o.jpg

   Сүүлийн жилүүдэд Өмнөд Солонгосын кино урлаг дэлхий нийтийн анхаарлыг улам ихээр татаж байна. Жил бүр тус улсын найруулагчид өөрсдийн бүтээлүүдийг олон улсын кино наадмуудад танилцуулсаар байгаа нь үүний тод жишээ юм. Тухайлбал өнгөрсөн 2018 оны Каннын кино наадам дээр л гэхэд Өмнөд Солонгосын таван кино танилцуулагдаж байсан бол энэ жилийн уг наадамд найруулагч Бун Жун Ху-гийн “Шимэгчид” кино наадмын гол шагнал “Алтан дал модны навч”-ийг хүртжээ.

   Мөн Холливүүд ч гэсэн Солонгосын кино урлагийг сонирхох болсон нь Америкчууд 2013 онд алдарт "Oldboy" киноны шинэчилсэн хувилбарыг бүтээж байсан туршлагатай бол, тун удахгүй тэд "The Man From Nowhere" триллер, бид бүгдийн сайн мэдэх "Train to Busan" нэртэй зомбины тухай блокбастер, "The Wailing" гэх аймшгийн кино (Ридли Скотт дахин бүтээхээр болсон), мөн "The Beauty Inside" гэдэг утга уянгын киног дахин хийхээр болсон байна.

   Сонирхуулахад "The Beauty Inside" киноны Америкчуудын бүтээсэн хувилбарт жүжигчин Эмилия Кларк/GOT-ын Таргариен/ гол дүрд нь тоглохоор болсон байна. Энэ дашрамд дурдахад мөн домогт найруулагч Квентин Тарантино ч бас Ази кинонд их дуртай бөгөөд түүний хамгийн дуртай киноны жагсаалтын эхний арван байранд гурван ч Солонгос кино багтдаг байна.

   Хамгийн сонирхолтой нь Солонгос найруулагчид нэг кинонд маш олон төрлийн жанр багтааж чаддаг явдал юм. Тухайлбал нэг кинонд аймшгийн, инээдмийн, утга уянгын, уран зөгнөлт зэрэг янз бүрийн жанруудыг  чадварлагаар хослуулсан байдаг нь олонтаа тохиолдоно. Харин одоо бид сүүлийн хэдэн жилд гарсан, хамгийн сонирхолтой бас заавал үзэх хэрэгтэй Солонгос кинонуудын соруудаас сонгон танилцуулж байна.

 

korean_movies_2017_6.jpg

                                                                         1. "The Handmaiden"
   Өнгөрсөн оны Каннын кино наадамд танилцуулагдсан хамгийн сонирхолтой бүтээлүүдийн нэг бол найруулагч Пак Чан Ук-ийн "The Handmaiden" нэртэй сэтгэлзүйн триллер юм. Киноны үйл явдалд Нам Сук Хи гэх хулгайч бүсгүй Хидеко хэмээн Япон чинээлэг хатагтайн гэрт гэрийн үйлчлэгчээр ажилд орно. Нам Сук Хи эхэндээ хатагтайг юу ч үгүй хоослох, маш нарийн төлөвлөгөөтэй байдаг ч тэдний хооронд хайр дурлалын харилцаа үүссэнээр үйл явдал огт өөрөөр эргэдэг. Хэдийгээр кинонд маш их хүчирхийлэл ба эротик хэсгүүд гардаг ч үнэн хэрэгтээ "The Handmaiden" бол маш гайхалтай хайр дурлалын түүхийг харуулсан, гүн гүнзгий сэдэвтэй кино юм.

 

 

oldboy.jpg

                                                                                 2. "Oldboy"
   "Oldboy" бол энэ жагсаалтанд заавал байх ёстой кино. Мөн л найруулагч Пак Чан Укийн бүтээсэн энэхүү триллер нь Японы манга зохиолоос сэдэвлэсэн бөгөөд Өмнөд Солонгосын бүх цаг үеийн хамгийн шилдэг бүтээлүүдийн нэг яах аргагүй мөн билээ. Киноны үйл явдалд О Дэ Су гэх бизнесмен эхнэрийнхээ үхэлд буруутгагдан тусгай "шоронд" 15 жилийн турш хоригддог. Түүний өрөөнд цонх байхгүй тул тэр гаднах ертөнцийн талаарх мэдээллийг зөвхөн зурагтаар дамжуулан олж мэддэг. Эцэст нь О Дэ Су өөрийнх нь амьдралыг сүйрүүлсэн хүмүүсээс өшөө авахаар шийдэж, аюултай тоглоомонд оролцоно. Дашрамд хэлэхэд "Oldboy" кино нь 2004 оны Каннын кино наадмаас Гран-при шагналыг хүртсэн билээ.

 

 

korean_movies_2017_1.jpg

                                                                             3. "Snowpiercer"
   Бун Жун Ху-гийн найруулсан "Snowpiercer" шинжлэх ухааны уран зөгнөлт кино нь Францын "Le Transperceneige" гэх зохиолоос сэдэвлэн бүтээгджээ. Киноны үйл явдалд дэлхий цаг уурын өөрчлөлтөөс болж мөстлөгийн үед автсан байх болно. Харин амьд үлдэж чадсан хэдхэн зуун хүмүүс маш өндөр технологиор бүтээгдсэн галт тэргэнд орогноно. Гэхдээ энд ч гэсэн нийгмийн давхарга, ялгаварлал хэрэгжиж байдаг. Жишээлбэл галт тэрэгний сүүл хэсэгт ядуу хүмүүс нь амьдарч, хорхой шавьжаар хийсэн капсулаар хооллоно. Харин галт тэрэгний урд хэсэгт дундаж бүлэг болон баячууд нь оршин сууж, хамгийн сайн чанарын хоол идэж, дээд зэрэглэлийн үйлчилгээг авна. "Snowpiercer" бол орчин үеийн капиталист нийгмийн үр дагаварыг маш сонирхолтой байдлаар харуулсан кино юм. Киноны гол дүрд Крис Эванс, Тильда Суинтон, Жейми Белл зэрэг Холливүүдийн жүжигчид тоглосон байна.

 

 

korean_movies_2017_2.jpg

                                                                           4. "Train to Busan"
   "Train to Busan" буюу "Пусан хүрэх галт тэрэг" бол Өмнөд Солонгосын хамгийн их ашиг олсон кинонуудын нэг (99 сая ам.доллар) юм. Киноны үйл явдалд нэгэн аав бяцхан охиныхоо хамт Пусан орох хурдан галт тэргэнд сууна. Харин энэ үеэр үл мэдэгдэх нян тээсэн нэгэн эмэгтэй галт тэргэнд орж ирэн зорчигчдод нян халдааж, хүмүүсийг зомби болгон хувиргадаг. "Train to Busan" бол зүгээр ч нэг зомбитой кино биш харин хүмүүсийн хүн чанарыг маш тод харуулсан шилдэг бүтээлүүдийн нэг юм.

 

 

korean_movies_2017_4.jpg

                                                                                 5. "Mother"
   "Snowpiercer" киноны найруулагч Бун Жун Ху-гийн бас нэгэн суут бүтээл бол "Mother" гэх гэмт хэргийн сэдэвтэй утга уянгын кино билээ. 2009 онд нээлтээ хийсэн энэхүү киноны үйл явдалд нэгэн жижиг тосгонд ганц бие ээж, До Жун гэх бага зэрэг ухаан муутай хүүгийнхээ хамт оршин сууна. Нэгэн орой хүү нь маш их согтсон байдалтай гэртээ харих бөгөөд тэрээр замдаа сургуулийн сурагч охинтой тааралддаг. Харин маргааш нь цагдаа нар охиныг нас барсан байдалтай олж, түүнийг хөнөөсөн хэрэгт До Жуныг буруутган шоронд хийдэг. Харин хүүгийнхээ төлөө юу ч хийхээс буцахгүй ээж нь До Жун-г буруугүй гэдгийг нотлохын тулд энэ хэргийг өөрөө мөрдөж эхэлнэ.

 

 

korean_movies_2017.jpg

                                                                               6. "The Host"
   Анх 2006 онд нээлтээ хийж байсан энэхүү киноны үйл явдалд дайны туршилтын үр дүнд бий болсон учир битүүлэг амьтан Өмнөд Солонгосын жижиг хотын иргэд рүү дайрч эхэлдэг. Энэхүү мангасын хамгийн анхны хохирогч нь нэгэн залуу бүсгүй байх ба үл мэдэгдэх амьтан түүнийг шүүрч, голын ус руу орон алга болдог. Харин бүсгүйн аав өөрийн охиноо хайхаар мангасын араас явдаг. "The Host" киноны үйл явдал учир битүүлэг мангас эсвэл засгийн газрын нууцад биш, харин нэгэн жижиг гэр бүлийн хоорондын харилцаанд суурилснаараа маш онцлог болсон юм. Түүнчлэн энэхүү кино нь АНУ ба Өмнөд Солонгосын харилцааг далд утгаар харуулсан байна. Тодруулбал 2000 онд АНУ-ын зэвсэгт хүчин Өмнөд Солонгосын газар нутагт нэвтрэн орж байсныг киноны уран бүтээлчид давхар шүүмжлээд авсан юм.

 

 

korean_movies_2017_5.jpg

                                                                     7. "Memories of Murder"
  Энэхүү киног 1986-1991 онд Өмнөд Солонгост гарч байсан цуврал аллагаас сэдэвлэжээ. Болсон явдлаас сэдэвлэсэн уг киноны үйл явдалд янз бүрийн насны 10 эмэгтэй хөнөөгдсөн байдалтай олддог. Хэргийг нутгийн хоёр цагдаа мөрдөх болов ч тэд энэхүү адармаатай хэргийн учрыг олж чаддаггүй билээ. Тиймээс тэдэнд туслахаар нийслэл хотоос мэргэжилтэн ирдэг. Харин мөрдөгчид хамтдаа гэмт хэрэгтэн зөвхөн аадар бороотой үед, улаан өнгийн хувцас өмссөн бүсгүйчүүд рүү дайрдаг болохыг олж мэднэ. Сонирхуулахад энэ хэрэг нь Өмнөд Солонгост бүртгэгдсэн анхны цуврал аллага байсан бөгөөд өнөөг хүртэл илрүүлж чадаагүй байгаа юм.

 

 

WWW.MGLRADIO.COM 

Солонгос мэдээ булан

 

 

 

 

 

 

Who's СолонгосМэдээ

profile

Articles

1 2 3 4 5 6 7 8 9 10