Монголоо санасан бүсгүйн сэтгэл

by СолонгосМэдээ posted Jul 04, 2019
?

Shortcut

PrevӨмнөх Бичлэг

NextДараах Бичлэг

ESCХаах

Larger Font Smaller Font Дээш Доош Go comment Хэвлэх

safe_image.jpg

   Алс хол хүний нутагт аавыгаа би сананхан зүүдэллээ....гэдэг дуу шиг өнөөдөр хүний нутаг, гүний хошуунд амьдахын эрхээр үр хүүхэд, хань ижлээ орхин ажиллаж буй Монгол ээжүүддээ зориулан БНСУ-д бяцхан үрээ орхин хараар ажиллаж буй бүсгүйн нийтлэлийг хүргэж байна.

МОНГОЛОО БИ САНАНА (Солонгос-с)

   Би 40 гарч яваа бүсгүй. Хожуу мэндэлсэн үрээ хөхнөөс нь гаргаж үлдээчихээд холын холд ирээд байж байна.

   Хэдэн хүүхдийнхээ бор ходоодыг тэжээхийн төлөө яваа надад эх орноо, ирээдүйд ийш ирэх хүмүүсээ бодох сөхөө байсангүй. Би харласан.

   Эд мөнгөний төлөө үрсээ өнчрүүлж, идэх хоол, өмсөх хувцас, нүүрний будгаа хүртэл танасаар ажил-умгар өрөөний хооронд гүйж байна. Надад ямбалах битгий хэл өвдөх эрх байхгүй. Бидэнд олон хүн цугласан газраар явж Монгол таун-ыг зүглэх эрх байхгүй. Бид баригдаж болохгүй. Баригдвал ажиллаж байгаа газраа зааж болохгүй, авах ёстой цалингаа ч авч болохгүй. Ер нь ажил олдоод амьдарч байгаа нь их юм шүү дээ.

   Хүний нутаг гүний хошуунд ирснийх ах дүү, үр хүүхдэдээ сайн байгаагаа харуулах гэж хэдэн зураг дарна. Утаагүй агаарт, өндөр цалинтай жаргаж байна уу гэж хүмүүс асуудаг. Тиймээ би жаргалтай зурагны цаана угааранд үлдээсэн үрээсээ өнчирсөн ээж байна.

    Гурван сарын визээр ирээд цай савладаг байсан. Цалин арай ахиу учраас барилгын цэвэрлэгээ, зочид буудлын цэвэрлэгээнд ажилладаг. Илүү цаг, нэмэлт ачаалал гэж үүрүүлдэггүй ээ. Харин 1 өрөөг цэвэрлэх нормт хугацаа гэж бий.

   Улс нь нийгэм нь сайхан. Гэхдээ өртөг өндөр. Монголчууд маань яаж эндээс бараа аваад Монголд хямд зараад байдаг юм бол гэж хааяа боддог.

   Энд бид өөр зүйлд анхаарал хандуулалгүй ажлыхаа цагт ажлаа яс хийдэг. Монголдоо бол ийш тийш босно, цай ууна, хүмүүстэй ярилцана. Энд тиймгүй. Энд ирснээр монголд байхдаа бид ажлын бүтээмжид төвлөрч сураагүй, салгалж яваад цалин авчих санаатай ч байжүү дээ гэж бодсон.

   Монголд маань 40 хүрсэн хүнийг ажилд авах дургүй, өөрийн бизнесээ эхлүүлье гэхэд зээл үнэтэй, эхлүүлээд ажиллахад ашиг тааруу байдаг.

   Би төр засгийн өмнөөс амьдраагүй учраас муулах шалтгаан байхгүй гэж боддог байсан... Гэтэл 40 хүрээгүй иргэд нь ажлын байргүй, идэр залуус нь энд цугласан, үлдсэн хэдээс маань зөндөө олон нь гадагш гарахыг хүсч явна.

   Ахиу цалин олж ганц байртай болчих гээд, хэдэн хүүхдээ утаа ханиаднаас холдуулчих гээд, зарим нь хүүхдээ энд төрүүлбэл хүүхэд минь томроод энд сурах боломжтой болно гэх бодол тээхдээ бид дүрвэж байна.

Тал дүүрэн нутагтаа цэнгэг агаараар амьсгалаад зүгээр л амьдрахыг хүснэ. 
   Тэнд бид энд авдаг цалинг хүсэхгүй. Бид ердөө татварын мөнгө нь шударгаар зарцуулагдаж утаанаасаа салгах алхам хийдэг, үрс минь 1 ангид 60
-уулаа биш 30-уулаа суудаг, машингүй байсан ч хүүхдүүдээ нийтийн тээврээр зөөчих боломжтой энгийн л орчинг хүснэ.

   500 000 биш 1 сая төгрөгийн цалинтай, утаанаас зугтаад хөдөө ажиллахад ажил нь олддог хэвийн л амьдралыг хүснэ.

   Хониныхоо шинэ шөлийг уугаад, тарьсан төмсөөрөө хоол хийхийг хүснэ. Бухимдал, айдасгүй шударга нийгмийг хүснэ.

   Үрээ үнсэхийг хүснэ, хоолны мөнгөний төлөө холдохгүй байх улсыг хүснэ. Улсаа хөгжихийг харахыг хүснэ, гар бие оролцохыг хүснэ.... Үр, сэтгэл 2 минь үлдсэн зүүдний диваажин МОНГОЛОО БИ САНАНА гэж бичжээ.

 

БНСУ, H.Б            2019.07.01

WWW.MGLRADIO.COM 

Солонгос мэдээ булан 

 

Who's СолонгосМэдээ

profile

Articles

1 2 3 4 5 6 7 8 9 10