Хүндтэй хойморт хөгшид заларсан
Хүүхэд багачууд орж гарч гүйлдсэн
Дэлхийн алтан нар дээрээс нь ивээсэн
Дэнж чимсэн монгол айл байна аа
Хотондоо  дүүрэн хонин сүрэгтэй
Хойгуур урдуур нь адуу үхэр багширсан
Хотож банхар холын чимээ авсан
Хөндий тал чимсэн монгол айл байна
Хөх аргалын гал дөллөж бадамласан
Хол ойрын зочин гийчин бууж мордсон
Таван тансаг идээ сав дүүрэн мэлтэлзсэн
Тохьтой зочломтгой монгол айл байна
Амттай цайгаа шимтэн оочилсон
Айраг сархадаа амрааж зооглосон
Аялгуут дуугаа дуулж цэнгэсэн
Атар нутгийн монгол айл байна
Арслан барс авдар дээрээ урласан
Амьтай бурхад шидтэй судраа дээдэлсэн
Таван хошуу малын хишиг буян эдэлсэн
Тив дэлхийн нүүдэлчин монгол айл байна
Тэмээ үхэр шар хөсөглөн ачаалсан
Тэнэгэр нутагтаа буурь сэлгэн буусан
Тогоонд нь аагтай цай дэвэрч даргилсан
Тааваар амгалан монгол айл байна
Дэлхийн өехий доор дэлүү шиг наалдсан
Дээд тэнгэрийн наран монгол айл байна
Нутгийнхаа лус савдаг аргадах ухаанаа
Мах цусандаа хадгалсан монгол айл байна
Садан дэлхийн энгээр уужим цараатай
Сансарын орон зайд монгол айл байна
Ижилгүй тэнгэрийн эрч хүчийг тулгандаа хурайлсан
Их монголын гал голомт монгол айл байна

Б.Эрдэнэцог

profile