1_00009.jpg

    Өмнөд Солонгос улсын цэргийн нэгэн өндөр албан тушаалтан болон түүний эхнэр нар өнөөдрөөс эхлэн цагдаагийн байгууллагад шалгагдаж эхэлжээ.

    Тэд албан тушаалаа ашиглан хугацаат цэргийн алба хааж байгаа цэргүүдээр гэр орон, хувийн ажлаа хийлгэсэн төдийгүй тэднийг хэл амаар доромжилж, гарт нь цахилгаан бугуйвч зүүлгэдэг байсан хэрэг үйлдсэн хэмээн буруутгагдаж байгаа ажээ.

    Ялангуяа тэрхүү өндөр албан тушаалтны эхнэр нь цэргүүдээр гэр орноо цэвэрлүүлэх, өдөр тутмын хоол хийлгэх, ногооны талбай дээр ажиллуулах, шал угаалгах зэргээр гэртээ боол мэт зарцалж байсан ба энэхүү зорилгоор 10 гаруй цэргийг гэртээ ажиллуулж, дуудсан үед хурдан шуурхай ирүүлж байхын тулд тэдний бугуйнд дуудлагын дохио өгдөг цахилгаан бугуйвч зүүлгэдэг байсан байна.

    Мөн тэд хамтдаа цэргүүдийг эцэг, эхийнх нь хамт хэл амаар доромжилж, найз нөхдийн уулзалтандаа дуучин, хөгжимчин цэргүүдээр  дуу дуулуулан, хөгжим тоглуулж, тогооч цэргүүдээр зочдын хоол бэлтгүүлж байсан зэрэг хэрг үйлдсэн нь илэрчээ.

   Энэхүү хэрэг олон нийтэд мэдээлэгдсэн даруй уг цэргийн өндөр албан тушаалтан нь тэтгэвэртээ гарах өргөдлөө өгсөн боловч Өмнөд Солонгос улсын Батлан Хамгаалах яамнаас уг хүсэлтийг хүлээн авалгүйгээр түүнийг Цэргийн шүүхэд шилжүүлэн өгсөн байна.

 

 

 

WWW.MGLRADIO.COM
Солонгос мэдээ булан.
 

 

 

두 손 모은 박찬주 대장부인