15020610845987a21c3ed9b.jpg

 

     Өмнөд Солонгос улсын Сөүл хотын шүүхээс өнөөдөр тус улсын Самсунг группийн дэд ерөнхийлөгч И Че Юнг-ийн үйлдсэн хэрэгт шүүхийн шийдвэр гаргах ажээ.

     Самсунг группийн дэд ерөнхийлөгч И Че Юнг нь экс ерөнхийлөгч Пак Гын Хе-гийн авилгалын хэрэгт холбогдсоноос хойш түр саатуулах байранд 161 хоносон ба энэ хугацаанд шүүх хуралд 53 удаа оролцсон бол түүний ойр дотны 59 хүн гэрчийн хувьд мэдүүлэг өгсөн байна.

     Тэрээр бизнес эрхлэгч Чуй Сүн Шил-ийн охин, Чонг Ю Ра-г морин спортоор хичээллэхэд зориулан тэдний Герман улсад байгуулсан хувийн компанид 1 тэрбум 300 сая вон, харин урлаг, спортыг дэмжих сайн дурын санд экс ерөнхийлөгчийн ятгалгаар 12 тэрбум воныг хандивласан хэмээн буруутгагдаж байгаа ажээ.

     Өнгөрсөн хугацаанд түүний туслахууд нь "Дэд ерөнхийлөгч И Че Юнг нь мөнгөн хандивын тухай огт мэдэхгүй бөгөөд бид дотооддоо гаргасан шийдвэрийг тухайн үед түүнд мэдээлэлгүй орхисон буруутай, тэрээр энэ хэрэгт огт хамаагүй" гэж мэдэгдсэн байна.

      Самсунг группийн дэд ерөнхийлөгч И Че Юнг нь 26 өмгөөлөгчтэй байгаа ба тэрээр түүнийг буруутгаж байгаа хэргийг хүлээн зөвшөөрөхгүй гэдгээ мэдэгдсээр байгаа юм байна.

 

 

 

WWW.MGLRADIO.COM
Солонгос мэдээ булан.