Хорвоод мэндэлсэн хосгүй энэ өдөр хүн бүхэнд аз жаргал, алив сайн сайхныг даллан байдаг амьдралын хамгийн сайхан мөчүүдийн нэг билээ. Дэлхийн өнцөг булан бүрт төрсөн өдрийг тэмдэглэх нь харилцан адилгүй басхүү давтагдашгүй уламжлалтай байдгаас та бүхэнд хамгийн “сонирхолтой” гэгддэг зарим орны заншлаас сонирхуулж байна.

 

 

Энэтхэг 
Энэтхэгт төрсөн өдрийн баярыг Хинду шашины уламжлалаар тэмдэглэн өнгөрүүлдэг бөгөөд нэг ой хүрч байгаа хүүхдийн анхны төрсөн өдрийг түүний үсийг хуссанаар тэмдэглэж эхэлдэг. Энэ нь хурсан аливаа муу энергийг үлдэн хөөж байгааг илэрхийлдэг байна. Төрсөн өдрөө тэмдэглэж байгаа хүүхдүүд цайвар өнгийн хувцас өмсөх ба анги хамт олон, найз нөхдөдөө шоколад тараадаг уламжлал бий гэнэ. Мөн эцэг эхийнхээ хөлд сөгдөн энэ хорвоод хүн болгож төрүүлсэнд талархсан сэтгэлээ илэрхийлж хүндэтгэл үзүүлдэг байна. Зарим гэр бүлүүд сүм хийдэд очиж мөргөл үйлддэг ажээ. 

Өмнөд Солонгос 
Солонгосчууд бяцхан үрээ мэндэлснээс хойш 100 дахь өдрийг гэр бүл, найз нөхдийн хүрээнд өргөнөөр тэмдэглэн өнгөрүүлдэг байна. Энэ үеэр улаан ба хар вандуй болон зөгийн балаар амталж хийсэн будааны бялууг тараадаг уламжлалтай ба хэр олон хүнд өгнө төдий чинээ буян хураана гэж үздэг ажээ. Төрсөн өдрийн энэхүү амтат зоогноос 100 хүнд өгөх нь тухайн төрсөн өдрийн эзэн хүү, охин нь урт удаан, аз жаргалтай амьдрахыг бэлгэддэг байна.

 

 

Вьетнам 
Шинэ оны баяр бол Вьетнамчуудын хувьд хүн бүрийн төрсөн өдөр нь гэгддэг бөгөөд энэ өдөр хүн бүр аз жаргал, баяр хөөрөөр дүүрэн шинэ оноо угтахын сацуу төрсөн өдрийн баяраа тэмдэглэдэг байна. Харин хүүхдүүдийн хувьд аль сарын хэдний өдөр төрсөн тухайн өдрөө төрсөн өдрийн баяраа тэмдэглэж өнгөрүүлэх ба эцэг эх нь дотроо “аз дагуулах шидтэй мөнгө” агуулдаг гэж итгэдэг мөнгөтэй улаан дугтуйг хүүхдэдээ бэлэглэдэг заншилтай ажээ. 

Ирланд 
Ирланд хүүхдийн төрсөн өдрийн баярыг тэмдэглэх уламжлал их хачирхалтай юм. Төрсөн өдрийн баярт уригдан очсон тохиолдолд энд “хүүхдийн эрхийг хамгаалах” тухай ярих нь тун зохисгүй үйлдэлд тооцогдоно. Учир нь Ирландчууд төрсөн өдөр нь тохиож буй хүүхдийг урвуу харуулж хөлнөөс бариад насны нь тоогоор толгойгоор нь “шал” мөргүүлдэг байна. Насны нь тоогоор шал “балбаж” дуусаад нэмээд нэг удаа цохих ба энэ нь түүнд аз хийморийг даллах аж. Мөн Ирландад 21 нас хүрч буй эрэгтэй хүүхдэдээ шинэ байшингийн түлхүүр гардуулан өгдөг ба энэ нь хүүгээ эрийн цээнд хүрснийг тодотгож амьдралаа бие даан авч явахыг хэлж байгаа хэрэг ажээ.

 

 

Дани 
Дани улсад төрсөн өдрийн баяр нь тохиож байгаа гэрийн гадаа төрийнхөө далбааг хийсгэдэг уламжлалтай ба төрсөн өдрийн эзнийг унтаж байхад нь бэлэгнүүдээ орыг нь тойруулж тавьдаг байна. Төрсөн өдөр тэмдэглэхтэй холбоотой бас нэгэн сонирхолтой уламжлал нь 30 гарсан залууст хамаарах ба “Pepper Men” / “Pepper Maids” гэх заншил ажээ. Энэ нь урьд өмнө огт гэрлэж байгаагүй 30 гарсан ганц бие бүсгүй эсвэл залууд оноох төрсөн өдрийн сонирхолтой бэлэг бөгөөд төрсөн өдрийн эзэнд перцний сав бэлэглэдэг юм байна.

Герман 
Германчуудын төрсөн өдрийн баярыг тэмдэглэх уламжлал нь лаатай нягт холбоотой бөгөөд төрсөн өдөр нь тохиож байгаа хүүхдийн эцэг эх өглөө эртлэн босч баярын ширээг бүхэл өдөржин асахуйц хэмжээний лаагаар чимэглэдэг. Хэр олон лаа байна тэр хэрээрээ төрсөн өдрийн эзэн аз жаргалтай амьдрахыг бэлгэддэг бөгөөд үдшийн зоогны дараа хүслээ шивнэн лааг нэг амьсгаагаар үлээдэг заншилтай байна. Нэг удаагийн үлээлтээр унтраах нь хүсэл удахгүй биелэхийг илэрхийлдэг бөгөөд харин 30 гарсан ганц бие эрчүүдийн хувьд төрсөн өдрийг тэмдэглэх заншил харьцангуй өөр юм. 

Ганц бие эрчүүд төрсөн өдрөөрөө шүүр авч хотын захиргаа эсвэл сүмийн гаднах шат, талбайг цэвэрлэдэг байна. Хогийг цэвэрлэж дуусахад найз нөхөд нь нэмж хог тарих ба энэ нь тухайн эрийг ирээдүйд гэрээ хэрхэн цэвэрхэн авч явахыг илэрхийлдэг гэж үздэг ажээ. Ингээд энэ өдрийн төгсгөлд тухайн ганц бие эр заавал нэг бүсгүйд үнсүүлж байж харих учиртай байдаг ч энэ нь бараг л биелдэггүй гэнэ.

 

 

Ямайк 
Карибын тэнгисийн орчмын зарим нутагт, тухайлбал Ямайкт төрсөн өдрийн баяр нь тохиож байгаа хүний нүүрийг гурилддаг уламжлалтай бөгөөд үүнийг найзууд ба гэр бүлийнхэн нь нүүрэнд нь нялдаг байна. 

Унгар 
Чихний омогноос угзчин татах явдал нь дэлхийн цөөнгүй орны төрсөн өдөр тэмдэглэх хачирхалтай уламжлалуудын нэг бөгөөд ялангуяа Унгарт энэхүү заншил түгээмэл тархжээ. Төрсөн өдрийн эзнийг бэлгээ задлах агшинд баярт уригдсан зочид чихний нь омогноос нэгэн зэрэг татах бөгөөд энэ үедээ “Бурхан чамайг минь ивээж, анд минь чихнийхээ омгийг шилбэ хүртлээ сунатал аз жаргалтай, урт удаан амьдраарай” гэж дуулдаг гэнэ.

 

БНХАУ 
Төрсөн өдрийн эзэнд зориулж эцэг эх ба найз нөхөд нь дугтуйнд мөнгө хийж бэлэглэх нь түгээмэл бөгөөд уламжлал ёсоор аягатай гоймонг нэг ч таслалгүйгээр идэх ёстой байдаг аж. Огт таслалгүйгээр идсэн гоймонгийнхоо уртын хэмжээгээр урт удаан наслах, аз хийморьтой байх эсэх нь хэмжигддэг гэж итгэдэг байна. 

Канад 
Канадад төрсөн өдрийн баярыг тэмдэглэх уламжлал нь төрсөн өдрийн эзний хамрыг цөцгий эсвэл маргаринаар тослох явдал байдаг бөгөөд үүнийг төрсөн өдрийн эзэнд мэдэгдэлгүй гэнэтхэн хийх учиртай байдаг гэнэ. Төрсөн өдрийн баяраараа ийнхүү хамрынхаа үзүүрт тос нялуулах нь аз хийморийг бэлгэддэг гэж үздэг байна.

 

Эх сурвалж: www.everyday.mn 

profile