Он цагийн очис 8

 

Тогмид мэргэн Солонгоотой учирснаас хойш аз хиймориор жигүүрлэн байв. Хэдийгээр удахгүй төрөх хүүхэд нь өөрийнх нь үр удам биш ч гэлээ тэр тухай бодохыг ч хүссэнгүй. Угаасаа олон жил ганцаараа амьдарч зожигдуухан явсан Тогмид өөрөөсөө дүүмэд бүсгүй дагуулан явахад хачирхан гайхах найз нөхөд түүнд бараг байсангүй.

Солонгоог ятгасаар гэртээ авчирч, өглөө оройгүй хоол хийн, өдөр бүр шинэ жимс зөөн, дэлгүүрлүү гүйж, гарч орохдоо амандаа дуу аялан, байн байн тольдож, ганган дээрээ улам ч гангална.

Хуучин машинаа хямдхан зарж шинэвтэр машин аваад Солонгоог суулган хотын гудамжаар салхи татуулан давхих хамгийн жаргалтай байв.

Солонгоод ч Тогмид өчүүхэн ч хөгшин санагдахгүй нь хачирхалтай. Өөр хүний хүүхэд тээсэн бүсгүйг үнэн сэтгэлээсээ хайрлаж, халамжлах түүнийг сэтгэлдээ өрөвдөнө. Төрснийх дараа гэрт нь хүргэж өгөөд бараа сураггүй алга боллоо гэхэд гомдох учиргүй байв.

Түүнд Тогмид шиг сайхан эр үнэндээ тааралдаж байгаагүй санагдаж, мөрийг нь түшээд зүүрмэглэхэд хамгийн жаргалтай байдаг аж.

Тогмид л надаас уйдахгүй бол би түүнийг насан туршдаа хайрлана. Хаягдаж үлдсэн ч түүний төлөө бүх насаараа залбирна гэж өөртөө тангарагламаар санагдана.

Ийнхүү өдөр хоног урсан урссаар нэгэн өглөө Солонгоо өвдөж төрөх эмнэлэгт нярайлав.

Тогмид охинтой болжээ. Баярласандаа гадаа гаран тамхи татан зогсоход хажуугаар өнгөрсөн хүмүүс бүгд инээмсэглэж байх шиг санагдана. Нар хүртэл ердийнхөөс тунгалаг болсон мэт гэрэлтэж байлаа.

хххх хххх

 

Солонгоо маргааш эмнэлэгээс гарна. Гэрийн өнцөг буланг үлдээхгүй цэвэрлэж, идээ таваг засан хөл болов.

Охиндоо шинэ өлгий, төрөл бүрийн тоглоом авсаар нэг өрөөгөө дүүргэчихлээ.

Тэр охиндоо Сүндэрьяа гэсэн нэр өгчээ.

Тогмидын Сүндэрьяа гэсэн гэрчилгээ аваад байн байн гаргаж үзмээр санагдана.

Миний охин Сүндэрьяа. Ээж шигээ ба Сүндэр шиг сайхан бүсгүй болно. Би охиндоо бүхнийг өөрөө зааж сургана. Яг л Энбат хүүг минь өөр шигээ бөх болгосон шиг би охиноо харваач болгоно. Миний хар нүдэн Сүндэрьяа. Магадгүй дүүтэй ч болно. Дүүг нь ч харваач болгоно. Би охиноо эрдэмтэй хүн болгоно. Бүхнээ зориулна гэж ганцараа бахардан орилмоор санагдав. Тогмид баярлах гомдохдоо хашгирдаг зантай ажээ. Тэртээ гучаад жилийн өмнө хангайн өндөр даваан дээр амь тэмцэн зугтааж явахдаа бас баригдаад гараа гавлуулж явахдаа, хүүтэй гэдгийг нь хэлсэн ч үл тоож элэг барьсан харцаар ширэвтатан харчихаад. өчүүхэн тээнэгэлзэхгүй алхаж одсон хар нүдэн Сүндэрийн араас горьдсон нүдээр харж хоцрохдоо бас амь тэмцэн хашгирч байсан билээ.