Он цагийн очис 9
Энхбат зааных энэ жил мянган мал тоолуулав. Тоологын комисс жилийн жилд Энхбатынд хоноглоно. Энд тэндгүй даалуу шажигнаж, инээд хөөр цалгисан хүмүүс.
Бага хүү даалууны гуншин жигтэйхэн дуудна. Ихэнхидээ өөрөө зохиох бөлгөө.
Том хүү Чингүүн заан булхайзах гэж тоймгүй. Хүн харахад дөлгөөн томоотой юм шиг хэрнээ цагаа тулахаар түүн шиг хөдөлгөөнтэй хүнгүй болно. Хүүхэд байхын булхайцаад дүүгээ уйлуулчихдаг байсан аж.
Нэг удаа ээжтэйгээ даам тоглож байгаад булхайцан баригдаад нүүрлүүгээ өрөгтэй даам цацуулж уйлаан майлаан болжээ. Эцэг нь Чингүүнийг өмөөрөөд эхнэртэйгээ муудан гурвалжин дөрвөлжин маргаан болж байсан удаатай.
Энэ удаа ч Чингүүн булхайцаж, эцгийнхээ гэрийг буулгачих шахав.
Ах дүү хоёр архайж дархайсан эрчүүд жаахан хүүхэд шиг ноцолдоод эхнэр хүүхэд нь хамжилцан бух мөргөлдөж байгаа юм шиг юм болов. Буурай аав нь улам догиож бах нь ханана.
Энхбат инээж сууснаа
- Хөөе мондинууд гэр буулгалаа. Гарч ноцолд. Бага байхын л ноцолдоод салдаггүй золигнууд байсан юм. Зангаа тавихгүй юмаа гээд хүржигнэтэл инээн тамхи нэрэх аж.
Том бэрдээ өвгөн эцэг нүүр өгөмтгий, харин бага бэртэйгээ Энхбат аминчхан.
Гурван ачдаа Сүндэр сүжрэнгүй ажээ.
Өглөө тооныхон дансаа нийлэх үед Энхбат ихэнхи малаа Чингүүнийд данслуулж мянгат малчин болгоно гээд суучихлаа.
Үүнийг сонссон Сүндэрьяа тас зөрөн нөхрөө мянгат малчин болгохоор зүтгэв.
Бага бэр нь дуугүй сууснаа 
-Яагаад заавал Чингүүн ах мянгат болдог юм. Манайх адилхан зургаан зуугаад малтайдаг гэж анх удаа хошуу цорвойн үг нэмэв.
Сүндэрьяа хүү бэрүүдээ харцаараа тас шилбүүрдэн нам болгоод 
-Манай нэрэн дээр мянга нэг зуун мал бичээд өг.
Үлдсэнийг нь эдний хоёрт тэнцүү хувааж бич. Аавын хэдэн малыг өөр дээр бүртгэ гэж тас хийлгэн тушаав.
Хадам ээжийн үг хууль ажээ.