Шувууны хэлээр...

 

Шувууны хэлээр надад хайртай гэж хэлээч
Шуурга мэт амьдралын тэнгэрт
Шувуу шиг би нисч явсан
Тэгвэл би сэтгэлд чинь газардана.

Салхины хэлээр надад хайртай гэж хэлээч
Сарны хээтэй, нарны өнгөтэй орчлонд
Салхи шиг би омголон явсан
Тэгвэл би нөмөрт чинь хоргодно.

Ус мөрний хэлээр надад хайртай гэж хэлээч
Утга гүн, уйтгар гэнэн амьдралд
Ус мөрөн мэт би урсаж явсан
Тэгвэл би өлмий дор чинь урсана.

Тэнгэрийн хэлээр надад хайртай гэж хэлээч
Тэртээ өндрийн бороог тосон
Тэнгэр мэт би амгалан оршсон
Тэгвэл би алган дээр чинь амсхийнэ.

Өвсний хэлээр надад хайртай гэж хэлээч
Өглөөний нарыг гандах л гэж тосдог амьдралд
Өвс шиг би намуухан ургасан
Тэгвэл би өвөр дээр чинь гандана.

Зүрхнийхээ хэлээр надад хайртай гэж хэлээч
Зүрхийг чинь би өчнөөн удаан хайхдаа
Зүгийн буданд үнэрийг нь алдаад уйлсан
Тэгвэл би үүрээ олоод очно.

 

2015. Р.ЭМҮЖИН.