Хүү нь ээжийнхээ хүзүүнд шүлэг хэлхэж өгье
Хүн болгонд үзүүлж, шөнө болгон уншаарай
Хүү нь ээжийнхээ хөлд шүлэг дэвсэж өгье
Хүйтэн шүүдрийн дуслуудыг шүлгээрээн сүлж
Хайрын цагаан сүү шиг бүлээн болгож өгье

Хүү нь ижийнхээ чихэнд шүлэг зүүж өгье
Хачин сайхан үгсийг үргэлж сонсож бай
Хүү нь ижийнхээ алган дээр шүлэг асгаж өгье
Холын оддоос ч олныг асгаж өгье

Хүү нь ижийнхээ тэргүүнд шүлгэн титэм зүүе
"Хорвоогийн хамгийн сайн ээж" гэж хэл бүхнээр бичье
Хүү нь ижийгээ шүлэг болгон эрхлүүлье
Хүслийнхээ хамгийн халуунаар хүүхэд болгон нялхраая

Хүү нь ижийнхээ цайнд шүлэг хөвүүлж өгье
Хүүхэд насны минь инээд бүрийг цайтайгаа хамт балга
Хүү нь ижийнхээ нулимсыг шүлгээрээ арчиж өгье
Хосгүй баярын нулимс болгож өгье

Хүү нь бас амлая

Хүний орчлонг танаас түрүүлж орхихгүй гэж
Хүн ёсноос хазгай явахгүй гэж
Хэлсэн захисан үг бүрийг тань дээдэлнэ гэж
Хүү нь хормойд нь шүлэг бүхнээ зулж амлая

Хүүдээ та харин нэг л зүйлийг хэлээч
Хөлсөрсөн зүүдийг минь хурайлан байж хэлээч
Хүний нутгийн зайд өнчин үлдээхгүй гэж
Хүүгээ эзгүйд бурхан болохгүй гэж хэлээч


Todko Samson
.