Эх дэлхийн дэвжээнд Монгол хүү зодоглож
Эр бярын хүчээр алтын болзол хангаж
Эх орныхоо далбааг олимпын тэнгэрт мандуулахад
Энэ бидний Монголчууд бүгдээр омогшсон удаатай

Жирийн малчны хүү ертөнцийн дэвжээг эзэгнэхэд
Жижигхэн гэгдэх Монголыг дэлхий мэддэг болсон юм
Түүхэнд байгаагүй түрүүг Монгол хүү хүртэхэд
Түмэн олон бүгдээр тэврэлдэн баярлаж байсан юм

Тэр

Босоо Монголчууд дэлхийд данстайг баталж
Боломжгүй зүйл хаана ч байдаггүйг нотолж
Уран мэх уйгагүй хөдөлмөрөө дэлхийд үнэлүүлж
Улсынхаа нэрийг тодоор тамгалсан эрэлхэг хүү

Түүний ялалтанд Монгол цустай бүхэн омогшиж
Төрж буй үрс түүний нэрээр давалгаалж
Хагаралдсан төрийн түшээд эвлэлдэн инээлдэж
Хамаг Монголыг омогшуулж чадсан тэр бидний эвийн хүү

Тэр

Алтаа мөнгөөр баталж аваргаа нотолсон ч
Авсандаа бардаж арагшаа ухраагүй дайчин хүү
Өвдөг шороодож ялагдал хүлээсэн ч
Үүрд бидний бахархалт хүү

Б.Бядаа
20160812