Хайрын аялгуу

/Богино өгүүллэг/

Мэлмэрээ цэнхэр нуурын мандал сэвэлзүүр салхины аалинд уярч, сайхан бүсгүйн санаа алдалт лугаа мэлтэс мэлтэс долгилохуй

-Торгоны хээ гэдэг чинь

Товгор ч юм уу даа ай хөөрхий хонгор минь дээ хө

Томоогүй сэтгэл гэдэг чинь 

Хэнээсээ гарав даа ай хөөрхий хонгор минь дээ хө гэсэн ардын дууны зөөлөн аялгуу сэтгэл сэмлэнэ.

 Аргадахуйн тарни мэт сэтгэл гэгэлзүүлэн аялах торомгор бүсгүйн гуниг шингэсэн тэлмэгэр нүдэнд амрагаа мөрөөдсөн их хайр ивлэн байх шиг ээ.

-Дурдангийн хээ гэдэг чинь

Дугирагхан ч юм уудаа ай хөөрхий хонгор минь дээ хө

Дуугүйхэн чиг суугаад байвал даа

Мордоод явчихна шүү ай хөөрхий хонгор минь дээ хө...

Сайхан төрсөн бүсгүй хүнд санааширах зовлон байдаг гэж үү хэмээн гайхширмаар.

Уулын царманд дэлбээлсэн цэцэгхэн мэт эмзэгхэн бүсгүйн зөөлөн аялгуунд уусах сэтгэлийн учиг үл мэдэгхэн чичигнэж, жаргах нарны шаргал туяатай ханьсан, сэмхэн ширтэхүй ийм сайхан төрсөн хүний үр энэхэн замбуулинд ховорхон заяах биз ээ гэж эрхгүй бодогдмоор...

Инээхэд нь гэрэл цацрах шиг жигдхэн цагаан шүд ярсхийлгэн мишээх Цээнээ бүсгүйг ийм гунигтай дуулж суухыг харж байсангүй.

-Хол нутгийн хүнд дасчихаад ингэж тарчилж суух нь жаргал юм гэж үү хэмээн асуумаар санагдавч яахин зүрхлэх.

Зүрхлэх ч гэж дээ хэлгүй хэвтэж яаж хэлэх гэсэн юм бол хэхэ гэж онгомол даавуун дээлтэй туранхай хөх залуу өөрийгөө чамлан суух нь хэлгүй Галаа гэгч ажээ.

Галаа энэ жил хорин тавны жил орж байгаа билээ. Цээнээгээс нэг ах.

Гурван ой гарантай хөлд орж баацаганан гүйх үедээ гэрийн сүүдэрт хэвтэж байсан хажуу айлын нохойн дээр гишигэж цочсоноос болж хэл нь татчихсан гэдэг.

Хар хур хийн дайрах нохойноос айсан нялх хүүг насан туршдаа хэлгүй болчихно гэж тэр үед хэн ч бодоогүй биз ээ.

Хүний хэлсэнийг ойлгодог ч гэлээ буцаад хэлэх эвээ олохгүй битүү дуугарна.

Хэдэн жилийн өмнө буурал ижий нь говь нутгийн "Хүүхэн хутагт"-д хүүгээ дагуулан мөргөж билээ.

Хэлгүй хүүгийнх нь сонорыг мялааж хулсан лимбэ бэлэглээд 

-Сэтгэлийнхээ долгисоор хөгжимдөж сур. Байгаль дэлхий баясаж чамд аз бэлэглэнэ. 

Хорин тавны сүүдэр зэрэгцэх дор аз гийх нигуурыг алдахгүй шүүрэх тохиол байна.

Атганд унасан зол баярыг алдвал амаа бариад, амиа тэвчээд ч алга урвуулах төдий аз харина гэж айлдсан бөлгөө.

Хэлгүй хүн дүлий байдаг бол Галаа тийм биш. Сонссон дуу авиа чихээр нь дамжин сэтгэлд нь уянгалав уу гэмээр Цээнээгийн дуулахыг чих тавин сонсож нүүрэнд нь гуниг баясал зэрэгцэн байв.

Цээнээг гэсэн сэтгэл нь хэмжээлшгүй их билээ. Гэвч сэтгэл гээчийн хэмжээс ямар байдгыг өмнө нь ямар үзсэн биш. Тэр байтугай энэ тухай бодож байсангүй.

Сонсгол сэвгүйн нотолгоо гэмээр сонссон аялгууг даган лимбэдэх дуртай ч түүнээ сэтгэлдээ шингээн байж хонины бэлчээрт холхон гарахаараа л лимбэдэж явлаа.

-Чисчүүний хээ гэдэг чинь

 Жижигхэн ч юмуудаа ай хөөрхий хонгор минь дээ хө

Чимээгүйхэн чиг суувал даа 

Мордоод явчихна даа ай хөөрхий хонгор минь дээ хө.

Чимээ аниргүй мэлмэрэх нуурын долгисыг аргадах мэт ардын дууны гуниг нэвт шингэсэн аялгуу нуугин нуугин дуурссаар чимээ алдрахуй...

Салхи сандчих мэт сэрчигнэн үлээж нуурын мандлаар хурган долгио ар араасаа үелзэн хөвсөлзөв.

Гэтэл хулсан лимбэний хөнгөн аялгуу агаарт цойлж, нуурын зүг нисэн ирж сонор мялаахуй бондгос хийтэл цочсон бүсгүй ухасхийн босч тал тийшээ саравчлан хартал хойд саахалтын хэлгүй Галаа богинохон лимбээр саяхан өөрийнх дуулан суусан "Торгоны хээ" ардын дууг гэгэлзүүлэнхэн лимбэдэж байв. 

Хөгжим гэгч энэхэн зэмсэгт хүний сэтгэлийн нэгээхэн чавхдасыг хөглөн татах шид шингэсэн ажгуу.

Тоглож байгаа аялгуундаа өөрөө уусан шингээд байна уу даа гэлтэй нүдээ анин лимбэдэх хөөрхий эрийн хэлж чадахгүй үгийг хулсан лимбэний аялгуу аргаданхан учирлах мэт ээ.

Авьяас гэдэг хүнд л заяах бурхны хишиг гэдэг үнэн ажээ.

Дүрлийтэл ширтэх Цээнээ бүсгүйг чанх өмнө нь мэлмэрэн зогсохыг ч үл анзааран хулсан либэнээс урсан гарах гэгээн аялгуундаа өөрөө уярч, нулимсан хэлхээ тасарсан мэт сувдран унахыг ширтэн, хэлгүй дүлий хэмээн үл анзаарах эрийн хаанаас ийм уран аялгуу урсан гарахыг гайхах мэт харан зогстол лимбэний аялгуу алдран алдарсаар тэртээд уусан шингэвэй.

Хайрын аялгуу...

 

Соёрхын Пүрэвсүрэн 2016"05"29

profile