Хадамд гарсан охин нь төрсөн гэрээ үүрд орхин гарахын өмнө ээж нь өмнөө суулгаад духан дээр нь удаан гэгчийн үнэсэв. “За, үр минь чамдаа ганцхан зүйлийг захья. Хувь заяагаа холбон буй эр нөхөр чинь чамайг голгүй гомдоохын цагт хэзээ ч битгий муу үг хэлж, муугаа үзүүлээрэй. Харин шүд зуун тэвчиж байгаад, тэр тоолон хоёр хөөрхөн хүүхэлдэй нэхээд байгаарай” гэж эх хэлжээ. Бүсгүй эм хүн болж, эхнэр болж, эх хүн болж, эмээ болов. Өвчний дүрээр ирсэн үхэл орны толгойд зогсохын үед эмгэн өвгөнөө дуудаад, нандигнан нуусан нэгэн хайрцагны байгаа газрыг зааж өгчээ.                  Өвгөн хайрцгийг нээвэл эр эм хос хүүхэлдэй, бас маш их мөнгө байв. “Чи намайг гомдоох үед үүнийг нэхсэн юмаа” гэж эмгэн хэлэв. Өвгөний нүдэнд нулимс дүүрч “Уучлаарай, миний амьдралын хамгийн үнэт хүн минь” гэж хэлэв. Санаатай санаагүй үй олон нүглүүд нүдний өмнүүр хөврөхөд цорын ганц удаа ч гомдоллон уйлж байгаагүй эхнэр нь нэгхэн хос хүүхэлдэй нэхсэнд баярласан нь тэр байж. “Харин наад мөнгийг чинь нэхсэн хүүхэлдэйнүүдээ зарж олсон юмаа” гэж эмгэн хэлжээ.
Охин үрээ хайрлаж байгаарай.
Ээжийгээ, эгчийгээ, дүүгээ хайрлаж байгаарай.
Эхнэрээ хайрлаж байгаарай.
Эмэгтэй хүн бүрийг, эм амьтан бүрийг хайрлаж байгаарай.
Тэд цөмөөрөө хүүхэлдэй нэхэж байдаг. Чимээгүйхэн, нулимсаа залгин залгин нэхсээр байдаг.
Тэд бас өөр олон юм нэхдэг

А.Тэмүүл

Эх сурвалж: Breakingnews.mn

profile