Home Blog

11-р сарын тусгай үүргийн нислэгийн хуваарь

0

Гамшгаас хамгаалах өндөржүүлсэн бэлэн байдлын хугацааг сунгасантай холбоотойгоор 11 дүгээр сард нийт 10 удаагийн нислэг үйлдэх урьдчилсан хуваарь гарсан талаар ГХЯ-ны Консулын газрын дарга Л.Мөнхтүшиг өнөөдөр болсон УОК-ын хуралдаанаар мэдээллээ. Үүнд:

  • 11 дүгээр сарын 3-нд Сөүл-Улаанбаатар
  • 11 дүгээр сарын 6-нд Алматы-Улаанбаатар
  • 11 дүгээр сарын 11-нд Токио-Улаанбаатар
  • 11 дүгээр сарын 12-нд Сөүл-Улаанбаатар
  • 11 дүгээр сарын 13-нд Сөүл-Улаанбаатар
  • 11 дүгээр сарын 18-нд Сөүл-Улаанбаатар
  • 11 дүгээр сарын 19-нд Франкфурт-Улаанбаатар
  • 11 дүгээр сарын 20-нд Сөүл-Улаанбаатар
  • 11 дүгээр сарын 25-нд Токио-Улаанбаатар
  • 11 дүгээр сарын 27-нд Сөүл-Улаанбаатарын чиглэлд нислэг үйлдэх хуваарь гараад байна.

Өнөөдрийн байдлаар 98 удаагийн тусгай нислэгээр 19.519 иргэнийг эх орондоо авчраад байна. 2020 оны нэгдүгээр сараас хойш автозам болон агаарын замын боомтоор 26.100 иргэн эх орондоо иржээ.

Эх сурвалж: montsame.mn

Та хоолны ширээнээс түрүүлж босдог уу?“Солонгос дахь Монголчуудын радио” нэвтрүүлэг | 2020-10-23

0

“Солонгос дахь Монголчуудын радио” нэвтрүүлэг | 2020-10-23

Сэдэв: Хоолны ширээнээс түрүүлж босдог уу?

Цаг үеийн мэдээ, онцлох пост: Томуугийн вакцин хийлгэсэн 36-д хүрчээ

Онцлох бичлэг : Бодит явдлаас сэдэвлэсэн кино

Хөтлөгч: Б.Чинбат, Б.Чанцаа

#MGLRADIOLIVE #Солонгосэфир

Дэлхийн Монголчуудын – MGLRADIO 88.3

“Samsung”-н тэргүүний технологийн зах зээлийн тэргүүлэгчийн байр сууринд хүрсэн замнал

0

МОСКВА. /Kommersant/. БНСУ-ын “Samsung” корпорацийг олон жил удирдсан Ли Кун Хи Сөүл хотын эмнэлэгт 78 насандаа таалал төгсжээ. Түүний хүчинд л компани ухаалаг гар утас, чип, ахуйн техник хэрэгслийн үйлдвэрлэлээр БНСУ-д төдийгүй дэлхийн өндөр технологийн зах зээлд тэргүүлэгчдийн нэг болсон юм.

Гэсэн ч “Samsung”-н тэргүүн Ли танил тал, гэр бүлийн холбоо сүлбээг ашигладаг, ажилтнуудынхаа эрх ашгийг үл тоодог, авторитар удирдлагын хэв маягийг баримталдаг хэмээн нэг бус удаа шүүмжлүүлж байсан нэгэн бөгөөд түүнд хэд хэдэн удаа эрүүгийн хэрэг үүсгэж байжээ.

Гэр бүлийн үйл хэргийг үргэлжлүүлэгч

Ли Кун Хи таалал төгссөн тухай дэлхийн технологийн тэргүүлэгч корпорациудын нэг “Samsung Electronics” ням гарагт мэдэгджээ. Түүний ямар шалтгааны улмаас таалал төгссөн нь тодорхогүй байгаа хэдий ч зүрхний шигдээсийн улмаас 2014 онд эмнэлэгт хүргэгдсэнээсээ хойш Лигийн биеийн байдал илт дордсоор байжээ.

Ли Кун Хиг нэг талаас “Samsung”-г хямд үнэтэй богино долгионы зуух, телевизор үйлдвэрлэгчээс дэлхийн хэмжээний компани болгож чадсан чадварлаг нэгэн хэдий ч нөгөө талаас авлигын хэд хэдэн дуулиан шуугианы эзэн бөгөөд татвараас бултагч, БНСУ-ын чеболь системийн амьд жишээ болсон эсрэг тэсрэгийн шинжийг агуулсан хүн байсан гэж ажиглагчид үздэг байна.

Тэрбээр 1942 онд Тэгү хотод “Samsung Group”-г үүсгэн байгуулагч Ли Бен Чолийн гэр бүлд төржээ. Ли Бен Чоль чинээлэг газар эзэмшигчдийн гэр бүлээс гаралтай хэдий ч түүний “Samsung Trading” нэртэй 1938 онд бий болгосон бизнес нь эхэндээ жимс, хатаасан загас экспортлох энгийн үйл ажиллагааг явуулдаг байжээ.

Тус компанийн бизнес нь хөгжин цэцэглэх үе нь Дэлхийн хоёрдугаар дайны дараагаас эхэлж, 1950 он гэхэд “Samsung Group” Солонгосын худалдааны хамгийн том 10 компанийн нэгт багтсан байна. Харин 1950-1953 оны хооронд болсон Солонгосын дайны дараа компани бизнесийн үйл ажиллагаагаа худалдааны чиглэлээс цахилгаан бараа, ахуйн техник хэрэгсэл үйлдвэрлэгч компани болгож өөрчилсөн байна.

Энэ үед Ли Кун Хи дунд сургуулиа төгсөж, Японы хамгийн нэр хүндтэй их сургуулиудын нэг Васэдад элсэн орж, эдийн засаг судалсан байна. Дараа нь тэрбээр АНУ-д Жорж Вашингтоны их сургуульд суралцсан хэдий ч дипломоо аваагүй байна. Ли Кун Хи 1966 онд буюу 24 насандаа эцгийнхээ компанид ажиллаж эхэлжээ. Анх тэрбээр “Samsung” компанид багтдаг “Tongyang Broadcasting Company” телевизийн компанид ажилладаг байсан бол удалгүй барилгын болон худалдааны хэлтэст нь ажиллах болсон байна. Тэрбээр Ли Бен Чолийн гурав дахь хүү байсан ч 1979 онд “Samsung Group”-н дэд ерөнхийлөгч болсон бөгөөд өв залгамжлагчид дундаасаа хамгийн бизнесийн ур чадвар хамгийн сайн гэдгээ батлан харуулж чадсан нэгэн аж.

Солонгос маягаар хийсэн өөрчлөн байгуулалт

Эцэг нь нас барсны дараа буюу 1987 онд Ли Кун Хи “Samsung”-г удирдах болжээ. Ингээд тэрбээр нээх удалгүй компанидаа томоохон өөрчлөлтийг хийж эхэлжээ. Тухайн үед цахилгаан бараа, ахуйн техник хэрэгслийн үйлдвэрлэлийг идэвхтэй явуулж байсан “Samsung”-н Япон технологид суурилсан телевизор, богино долгионы зуух, хөргөгч нь хямд боловч чанарын хувьд онцгой сайн биш гэдгээрээ олонд илүү танигдсан байв. Компани 1973 онд хагас дамжуулагчийг хөгжүүлж эхэлсэн хэдий ч тухайн үеийг нь өнөөгийн амжилттай нь харьцуулахад даанч хол байв.

1990-ээд оны эхээр Ли хоёр сарын хугацаатай барууны корпораци, үйлдвэрүүдээр зочилжээ. Энэ үед л Ли бүтээгдэхүүнийхээ тоо хэмжээг бууруулаад ч болов хамаагүй чанарыг нь сайжруулахыг зорьж, барууны технологи, компанийн удирдлагын арга барилд тулгуурлан бизнесийн томоохон өөрчлөлт хийхээр шийдэв.

“Эхнэр хүүхдээсээ бусдыг нь өөрчилж зоригтой шинэчлэл хий” хэмээн Ли шилдэг менежерүүддээ хандан уриалж байсан нь түүний хамгийн алдартай уриа үгнүүдийн нэг болжээ.

“Samsung Electronics ба цахилгаан бараа үйлдвэрлэлээр тэргүүлэгч байхын төлөөх тэмцэл” хэмээх 2010 онд хэвлэгдсэн номонд Лигийн тухай нэгэн бяцхан түүхийг өгүүлжээ. Бүтээгдэхүүний чанарын хувьд асуудал дагуулсан нэгэн үйлдвэр дээрээ Ли 1995 онд биечлэн зочилж, ажилтнуудынхаа өмнө үг хэлэх үеэрээ чанарыг сайжруулахыг тэдэнд уриалахаас гадна “Чанар бүхнээс дээгүүр” гэсэн бичигтэй толгойн алчуур зүүхийг шаарджээ. Үүгээр зогсохгүй тэрбээр тус үйлдвэрээс гаргасан 50 сая ам.доллар бүхий бүтээгдэхүүнийг устгалд оруулж байсан гэдэг.

Энэ үед корпорацийн бүхий л чухал шийдвэрүүдийг гаргадаг байсан Лигийн хэмжээлшгүй эрх мэдэл нь өсөн дэвшихэд нь нэмэр болжээ. 2008 оны санхүүгийн хямралын үеэр Ли чип, дэлгэцийн үйлдвэрлэлийн хөгжилд олон тэрбум ам.долларын хөрөнгө оруулах шийдвэр гаргасан гэдэг. Сөүл хотод агаарын чанар маш муу байсан нэг өдөр Ли ахуйн техник үйлдвэрлэлийн хэлтсийн тэргүүнтэй утсаар ярьж, компани яагаад агаар цэвэршүүлэгч үйлдвэрлэдэггүйг асуусан байна. Ингээд компани нэг сарын дотор энэ сегментээр үйл ажиллагаа явуулах груп байгуулж, удалгүй агаар цэвэршүүлэгч үйлдвэрлэх болж байсан аж.

Компанид шинэчлэл хийгдсэнээс хойш 20 жилийн дараа буюу 2010-аад оны эхээр “Samsung” одоо байгаа хэмжээндээ хүрч, цахилгаан бараа, өндөр технологийн хэд хэдэн салбарт дэлхийд тэргүүлэгч болсон нь гайхах зүйлгүй юм.

Эрүүгийн хэргүүд ба үйлдвэрчний эвлэл байгуулахад тавьсан хориг

Лигийн хэмжээлшгүй эрх мэдэл компанид зөвхөн давуу талыг авчирсангүй. Компанийн бүх чиглэл хөгжих зам ч мөн дардан байсангүй. Ли үнэтэй автомашинд тун дуртай нэгэн байсан бөгөөд “Samsung Motor” салбарыг хөгжүүлэхэд асар их хөрөнгө мөнгө цацжээ. Гэсэн ч энэ хэлтэс ихээхэн алдагдал хүлээсээр 2000 онд дампуурахын даваан дээр байхад нь энэ бизнесийг Францын “Renault” худалдан авчээ.

Улс оронд нь компанид болон түүний домогт удирдагчдад нь хандах хандлага харилцан адилгүй байв. Нэг талаас нийгэм түүний алдар гавьяаг хүлээн зөвшөөрдөг ч нөгөө талаас танил тал, гэр бүлийн холбоо сүлбээг ашиглах, хууль бусаар эрх баригчдад нөлөөлөхийг оролдох, бизнес хийх ил тод арга хэлбэрийг үргэлж ашигладаггүй хэмээн хүмүүс түүнийг шүүмжилдэг байв.

Ли өөрөө ч хэд хэдэн дуулиан шуугианы эзэн болсон юм. 1996 онд тэрбээр Өмнөд Солонгосын ерөнхийлөгчийн албан тушаалыг 1988-1993 онд хашиж байсан Ро Дэ Уд хахууль өгсөн хэмээн буруутгагдаж байсан хэдий ч хожим нь түүнд өршөөл үзүүлсэн байна. 2008 онд түүнийг татвараас зайлсхийсэн, албан тушаалаа урвуулан ашигласан, төрийн албан хаагчдад хахууль өгсөн  хэмээн буруутгаж байсан юм.

Үүнээс гадна Лиг хэмжээлшгүй эрх мэдэлтэй, удирдлагын авторитар хэв маягтай хэмээн шүүмжилдэг байв. Хагас дамжуулагчийн үйлдвэрт ажилладаг ажилтнуудад нь уушгины хавдар илэрсэн олон тохиолдол бүртгэгдсэн бөгөөд энэ тохиолдлууд нь хөдөлмөрийн нөхцөлийн бодлогод удирдлага хайхрамжгүй хандсантай холбоотой хэмээн олон нийтийн хэвлэл мэдээллийн хэрэгслүүд бичиж байв.

Нарийн төвөгтэй өв залгамжлалын асуудал

“Samsung”-н тэргүүн хэвээр байсан Ли 2014 оны 5 дугаар сард зүрхний шигдээс болсноосоо хойш дийлэнх цагийг эмнэлэгт өнгөрүүлж, бизнесийн үйл ажиллагаанаасаа ихээхэн холджээ. Ли Кун Хи нас барах үед ч Солонгосын хамгийн чинээлэг хүн хэвээр үлджээ. “Forbes” сэтгүүл түүний хөрөнгийг 21 тэрбум ам.доллароор үнэлсэн байна.

Ли Кун Хи нас барснаар өв залгамжлагчдад нь шийдвэрлэх хэрэгтэй олон төвөгтэй асуудлууд үлдэж байна. Компани технологийн тэргүүлэгчдийн нэг хэвээр хэдий ч өрсөлдөгчид тэр дундаа Хятадын ухаалаг гар утас үйлдвэрлэгчид өсөн нэмэгдсээр байгаа билээ.

Үүнээс гадна эх оронд нь тус компаниас ил тод байх, удирдлагаа шинэчлэх, угсаа дамжсан тогтолцооноосоо татгалзахыг шаардаж, шүүмжилсээр байгаа юм.

2016–2017 онуудад “Samsung” дахин томоохон дуулиан шуугианы эзэн болсон юм. Ли Кун Хигийн хүү Ли Жэ Еныг авлигын хэрэгт холбогдсон, хилийн чанадад хөрөнгө нуун дарагдуулсан хэмээн буруутгаж, таван жил шоронд хоригдох ял оноосон байна. Энэ хэрэг нь тухайн үед ерөнхийлөгч байсан Пак Гын Хетэй холбоотой хэргийн нэг хэсэг байсан юм. Эцгээсээ ялгаатай нь Ли Жэ Ен шоронгийн хаалга татаад амжжээ. Гэсэн ч давж заалдах шатны шүүх 2018 онд ялын тогтоолыг хэсэгчлэн цуцалж, шүүхийн шийдвэрийг түдгэлзүүлэх шийдвэр гаргасан байна.

Энэ онд БНСУ-ын Прокурорын газар Ли Жэ Ёныг хувьцааны үнийг зохиомлоор өсгөх эсвэл бууруулах, санхүүгийн залилан хийсэн, эргэлзээтэй гэрээ байгуулахтай холбоотой хэргээр дахин баривчлах хүсэлт гаргасан юм. Ли Жэ Ён сул чөлөөтэй явж байгаа хэдий ч энэ нь компанийн тэргүүнийх нь байр суурийг бэхжүүлж чадахгүй.

Тэрбээр “Samsung”-н удирдах эрхийг эцгээс хүүд шилжүүлдэг явдлыг таслан зогсоохоо хэдэн сарын өмнө мэдэгдсэн. “Өв залгамжлалын асуудлаар дахин маргаан дэгдээхгүй гэдгээ би амлаж байна. Би эрх мэдлээ үр хүүддүүддээ шилжүүлэн өгөх төлөвлөгөөгүй байна” хэмээн тэрбээр хэлсэн байна. Гэсэн ч энэ нь алс ирээдүйд шийдэгдэх асуудал хэвээр үлдэж байгаа бөгөөд Ли Жэ Ён компанийг дахин арван жилээр удирдаж магадгүй юм.

Гэхдээ энэ бүхнээс өв залгамжлалын татварын тухай асуудал нь Лигийн гэр бүлийнхний хувьд хамгийн хүнд асуудал нь болж магадгүй юм. Ли Кун Хи “Samsung”-н хамгийн том хувьцаа эзэмшигч байсан бөгөөд одоо түүний хувь хүү болон хоёр охинд нь шилжинэ.

БНСУ-ын хуульд зааснаар, өв залгамжлалын татвар нь 60 орчим хувийг эзэлдэг байна. Өөрөөр хэлбэл Лигийн өв залгамжлагчид 9 тэрбум ам.доллар давсан хэмжээний мөнгийг төлөх ёстой аж. Ийм хэмжээний татвар төлөх нь “Samsung”-н хувьцааны тодорхой хэсгийг зарахаас өөр аргагүйд хүрэх юм.

Эх сурвалж: Montsame.mn

БНСУ-д халдварын 119-н шинэ тохиолдол бүртгэгджээ

0

БНСУ-ын Халдварт өвчин судлалын төвийн 10:00 цагийн мэдээллээр тус улсын хэмжээнд коронавирусаар халдварласан тохиолдол 10 дугаар сарын 26-ны 00.00 цагийн байдлаар 119-өөр нэмэгдэж нийт 25955-д хүрэв. Шинээр илэрсэн 119 тохиолдлын 25 нь хилийн чанадаас зөөвөрлөгдөн ирсэн байна. Нийт 23905 (+36) иргэн эдгэрсэн бол 457 (-) иргэн нас барсан. Одоогийн байдлаар 2,552,264 (+6118) иргэнийг шинжилгээнд хамруулснаас 2,505,546 (+6918) иргэний хариу сөрөг гарч 20,763 (-919) иргэний хариу хүлээгдэж байна. Тусгаарлалтад 1,593 (+83) иргэн байна.https://www.cdc.go.kr/board/board.es?mid=a20501000000…

Эх сурвалж: Embassy of Mongolia in Seoul

Үйлдвэр

0

БНСУ, ОХУ дипломат харилцаа тогтоосны ойг тохиолдуулан үзэсгэлэн дэлгэнэ

0

СӨҮЛ. /Yonhap/. БНСУ, ОХУ дипломат харилцаа тогтоосны 30 жилийн ойг тохиолдуулан Үндэсний ассамблейд ирэх долоо хоногт тусгай үзэсгэлэн зохион байгуулна гэж БНСУ-ын Гадаад хэргийн яам баасан гарагт мэдээлэв.

Даваа, мягмар гарагт нээхээр товлосон үзэсгэлэнд 1990 онд Сөүл, Москвагийн хооронд дипломат харилцаа тогтоосноос хойш болсон түүхэн үйл явдлуудыг харуулсан 50 орчим ховор нандин гэрэл зургийг дэлгэх юм.

Үзэсгэлэнг нээж буйг тохиолдуулан мягмар гарагт парламентын танхимд зохион байгуулах ёслолын үйл ажиллагаанд Үндэсний ассамблейн дарга Пак Бюн Сюг, Гадаад хэргийн дэд сайд Ли Тэ Хо, ОХУ-аас БНСУ-д суугаа элчин сайд Андрей Кулик тэргүүтэй төлөөлөгчид оролцох төлөвтэй байна.

Үзэсгэлэнгийн хоёр өдрийн нээлтийн үйл ажиллагааг ийнхүү зохион байгуулсны дараа лхагва гаргаас цахимаар “korussia30.com” цахим хуудсаар толилуулах ажээ.

Эх сурвалж: Montsame.mn

 

“Samsung” группийн тэргүүн таалал төгсжээ

0

СӨҮЛ. /Reuters/. БНСУ-ын “Samsung” группийн тэргүүн Ли Кун Хи Сөүл хотын эмнэлэгт ням гарагт 78 насандаа таалал төгсжээ. Тэрбээр зүрхний шигдээсийн улмаас эмнэлэгт хэвтсэнээсээ хойш зургаан жилийн дараа нас барсан байна.

Ли Кун Хи нь эцэг Ли Бюн Чулын гоймонгийн худалдааны бизнесийг цахилгаан бараа, даатгал, хөлөг онгоц үйлдвэрлэл, барилга зэрэг олон арван охин компани бүхий БНСУ-ын хамгийн том конгломерат болоход хувь нэмрээ оруулсан юм.

“Тэргүүн Ли нь “Samsung”-ийг жижиг бизнеэсээс дэлхийн тэргүүлэгч инновац бүтээгч, аж үйлдвэрийн хүчирхэг төлөөлөгч болгон өөрчлөн байгуулсан алсын хараатай нэгэн байсан юм” гэж “Samsung” группийн мэдэгдэлд тэмдэглэжээ.

Ли Кун Хигийн удирдлага дор “Samsung Electronics” нь орлогынхоо хэмжээгээр дэлхийн хамгийн том технологийн фирм болж, чип, зурагт, дэлгэцийн үйлдвэрлэлээр Японы “Sony”, “Sharp”, “Panasonic”-ийг ардаа орхиж, “Nokia Oyj” компанийн гар утасны салбарын манлайллыг төгсгөж, ухаалаг гар утасны бизнест “Apple”-ийг гүйцсэн байна.

“Түүний үлдээсэн өв үүрд дуурсагдах болно” гэж “Samsung” мэдэгджээ.

Эх сурвалж: Montsame.mn

БНСУ-д томуугийн вакцинжуулалтыг үргэлжлүүлнэ

0

СӨҮЛ. /Yonhap/. БНСУ-д томуугийн вакцин хийлгэсний дараа олон хүн нас барсан тохиолдол бүртгэгдсэн хэдий ч вакцин, нас барсан тохиолдлуудын хооронд ямар нэгэн хамаарал тогтоогдоогүй тул вакцинжуулалтын хөтөлбөрийг үргэлжлүүлэхээр боллоо гэж тус улсын эрүүл мэндийн байгууллагын удирдлагууд бямба гарагт мэдээлэв.

БНСУ-ын Өвчинд хяналт тавих, урьдчилан сэргийлэх төвийн мэдээлснээр, вакцин хийлгэсний дараа нас барсан анхны тохиолдол 10 дугаар сарын 16-нд бүртгэгдсэнээс хойш ийм байдлаар нас барсан хүний тоо 48-д хүрсэн бөгөөд нас барагсдын 80 орчим хувь нь 70, 80 гаруй насны хүмүүс байжээ.

“Нас барсан 20 хүний цогцсонд хийсэн задлан шинжилгээний дүнгээс үзэхэд тэдний нас барсан шалтгаан, вакцин хооронд ямар нэгэн хамаарал тогтоогдоогүй тул томуугийн вакцинд үнэ төлбөргүй хамруулах хөтөлбөрийг зогсоох талаар хэлэлцэхгүй” гэж Өвчинд хяналт тавих, урьдчилан сэргийлэх төвийн тэргүүн Жён Юн Кён мэдээлсэн байна.

Эрүүл мэндийн байгууллагын мэргэжилтнүүд вакцин, нас барсан тохиолдлуудын хооронд холбоо хамаарал байх боломжтой эсэхийг нягт ажиглаж байгаа бөгөөд энэ онд вакцин хийлгэсний дараа зовуурь илэрсэн гэж 1154 хүн мэдээлжээ.

Жён Юн Кёны мэдэгдсэнээр, холбогдох албаны удирдлагууд вакцин хийлгэсний дараа нас барсан хүмүүс ямар шалтгаанаар нас барсныг тогтоохын тулд мэргэжилтнүүдтэй хамтран ажиллахаар төлөвлөж байгаа ажээ. Мөн тэрбээр ахмад настай хүмүүст вакцин тарихын өмнө нарийн оношилгоо хийхийг эрүүл мэндийн хүрээлэнгүүдэд уриалжээ.

БНСУ-д энэ өвөл “COVID-19”, улирлын томуу зэрэгцэн дэгдэхээс урьдчилан сэргийлэхийн тулд вакцинжуулалтад үнэ төлбөргүй хамруулах хөтөлбөрийг өргөтгөжээ. Үүний хүрээнд өсвөр насны хүүхдүүд, ахмад настнууд багтсан 19 сая орчим хүнийг вакцинжуулалтад хамруулахаар төлөвлөсөн байна.

Томуугаас үүдэлтэй уушгины хатгалгаа зэрэг өвчлөлөөр олон хүн нас барж болзошгүй тул томуугийн улирал эхлэхээс өмнө иргэдийг вакцинжуулах нь зүйтэй гэдэгт эрүүл мэндийн байгууллагын мэргэжилтнүүд санал нэгдэж байгаа юм. БНСУ-д томуугаас үүдэлтэй өвчлөлийн улмаас жилд 3000 орчим хүн нас бардаг байна.

Улирлын томуу нь ерөнхийдөө 11 дүгээр сарын сүүл, 12 дугаар сард дэгддэг ба томуугийн вакцин нь тарилга хийлгэснээс хоёр долоо хоногийн дараа эсрэг биет үүсгэдэг тул шаардлагатай хүмүүсийг 11 дүгээр сарын дунд үе гэхэд вакцинжуулахыг мэргэжилтнүүд зөвлөжээ.

Гэсэн хэдий ч БНСУ-д орон даяар богино хугацаанд олон хүн нас барсан тохиолдол бүртгэгдээд буй энэ үед олон нийтийг “нэн даруй” вакцинжуулах шаардлагатай эсэх талаар эрүүл мэндийн байгууллагууд санал хуваагдаад байна.

Солонгосын Анагаах ухааны холбооны хувьд вакцинжуулалтын хөтөлбөрийг нэг долоо хоног орчмын хугацаанд хойшлуулах саналыг Засгийн газарт хүргүүлсэн бол Солонгосын Вакцины асуудал хариуцсан нийгэмлэг вакцин, нас барсан тохиолдлуудын хооронд ямар нэгэн хамаарал тогтоогдоогүй тул вакцинжуулалтыг үргэлжлүүлэх хэрэгтэй гэж үзжээ.

Эх сурвалж: Montsame.mn

Сурталчилгаа

11-р сарын тусгай үүргийн нислэгийн хуваарь

0
Гамшгаас хамгаалах өндөржүүлсэн бэлэн байдлын хугацааг сунгасантай холбоотойгоор 11 дүгээр сард нийт 10 удаагийн нислэг үйлдэх урьдчилсан хуваарь гарсан талаар ГХЯ-ны Консулын газрын дарга...

“Samsung”-н тэргүүний технологийн зах зээлийн тэргүүлэгчийн байр сууринд хүрсэн замнал

0
МОСКВА. /Kommersant/. БНСУ-ын “Samsung” корпорацийг олон жил удирдсан Ли Кун Хи Сөүл хотын эмнэлэгт 78 насандаа таалал төгсжээ. Түүний хүчинд л компани ухаалаг гар утас, чип, ахуйн...

БНСУ-д халдварын 119-н шинэ тохиолдол бүртгэгджээ

0
БНСУ-ын Халдварт өвчин судлалын төвийн 10:00 цагийн мэдээллээр тус улсын хэмжээнд коронавирусаар халдварласан тохиолдол 10 дугаар сарын 26-ны 00.00 цагийн байдлаар 119-өөр нэмэгдэж нийт...

БНСУ, ОХУ дипломат харилцаа тогтоосны ойг тохиолдуулан үзэсгэлэн дэлгэнэ

0
СӨҮЛ. /Yonhap/. БНСУ, ОХУ дипломат харилцаа тогтоосны 30 жилийн ойг тохиолдуулан Үндэсний ассамблейд ирэх долоо хоногт тусгай үзэсгэлэн зохион байгуулна гэж БНСУ-ын Гадаад хэргийн яам баасан...

“Samsung” группийн тэргүүн таалал төгсжээ

0
СӨҮЛ. /Reuters/. БНСУ-ын “Samsung” группийн тэргүүн Ли Кун Хи Сөүл хотын эмнэлэгт ням гарагт 78 насандаа таалал төгсжээ. Тэрбээр зүрхний шигдээсийн улмаас эмнэлэгт хэвтсэнээсээ хойш зургаан...

Уншиж байна ...

Дахин ачаалах

Сонсох

Дууг хаах

Монгол