Батлан даагчтай болон батлан даагчгүй сургуулиудын ялгаа

Leave a Comment
1505

Бид өмнө нь батлан даагчтай болон батлан даагчгүй сургуульд суралцахаар виз мэдүүлэхэд ямар материал шаардлагатай талаар мэдээ бэлтгэн хүргэж байсан. Тэгвэл энэ удаа батлан даагчтай болон даагчгүй сургуулиудын ялгааг танилцуулж байна.

Ерөнхийдөө батлан даагчтай, батлан даагчгүй сургуульд материалаа явуулахад төдийлөн том ялгаа гардаггүй. Харин виз мэдүүлэх болон визээ сунгуулахад нэлээдгүй ялгаатай байдаг.

Батлан даагчтай сургууль

Батлан даагчтай сургуульд элсэн суралцах тохиолдолд батлан даагчийн материал заавал шаардлагатай бөгөөд батлан даагчийн материал шаардлага хангасан байх нь чухал юм.  Хэрэв батлан даагчтай сургуульд элсэн орох бол зөвхөн эцэг эх, төрсөн ах эгч дүү, авга нагацаараа  батлан даалгуулах боломжтой. Тиймээс цалин багатай ажил эрхэлдэг эцэг эхийн хувьд хүүхдээ батлан даахад хүндрэл учирдаг байна. Энэ мэт шалтгаанаас үүдэн сургуульдаа тэнцсэн хэдий ч батлан даалгах хүнгүй учир виз мэдүүлж чадахгүйд хүрэх тохиолдол гардаг ажээ. Тиймээс сургуулиа анх сонгохдоо өөрийг чинь батлан даах боломжтой хүн байгаа эсэхийг сайн нягталж шалгах хэрэгтэй. Мөн батлан даагчтай сургуульд суралцах бол 10,000-н мянгаас 20,000 мянган доллар банканд байршуулах шаардлагатай болдог. 

Батлан даагчгүй сургууль

Хэрэв батлан даах хүн байхгүй тохиолдолд батлан даагчгүй их сургууль руу материалаа бүрдүүлэх нь илүү ашигтай гэж хэлж болох юм. Учир нь батлан даагчгүй сургуульд суралцахаар виз мэдүүлэх бол тийм ч олон материал шаарддаггүй. Гэсэн хэдий ч хүмүүс батлан даагчтай сургуульд элсвэл батлан даалгах хүнтэй учраас виз баттай гарна хэмээн буруу ойлгодог. Элчин сайдын яамнаас жил бүр магадлан итгэмжлэгдсэн сургуулиудын жагсаалтыг гаргадаг ба эдгээр нь харлалт багатай сургуулиуд буюу батлан даагчгүй сургууль юм. Мэдээж суралцах сургуулиа визний материал бага бүрдүүлдгээр нь сонгож болохгүй хэдий ч харлалт бага, магадлан итгэмжлэгдсэн сургуулийг сонгох нь илүү зөв шийдэл гэж хэлж болно. Тиймээс хэрвээ Солонгос улсад суралцах хүсэлтэй байгаа бол элчин сайдын яамнаас гаргасан магадлан итгэмжлэгдсэн 87 сургуулийн жагсаалтыг хархад илүүдэхгүй биз ээ. Түүнчлэн батлан даагчгүй сургуульд виз мэдүүлэхэд банканд мөнгө байршуулах шаардлагагүй байдаг.

Батлан даагчтай болон батлан даагчгүй сургуулиудын визний материал бүрдүүлэлтийн талаарх мэдээллийг авах бол энд дарна уу. 


WWW.MGLRADIO.COM
Солонгос мэдээ булан