Тусгай сургуулийн хүүхдүүдэд бэлгийн дарамт үзүүлсэн бодит явдлаас сэдэвлэсэн кино бүтээжээ

Leave a Comment
189

2011 онд нээлтээ хийсэн Солонгосын “Дугани” гэх кино нь бодит амьдралаас сэдэвлэсэн гэдгээрээ нэлээдгүй шуугиан тарьсан бүтээлүүдийн нэг юм. Уг кино нь Гуанжү хотоос зайдуу орших нэгэн тусгай сургуульд болсон бодит явдлын талаар өгүүлсэн кино аж. Кино дэлгэцэнд гарч олонд хүрснээр бэлгийн хүчирхийллийн гэмт хэрэг шийтгэх тухай тусгай хуульд нэмэлт өөрчлөлт оруулж, хэрэг гарсан сургуулийг хаасан билээ.
Тус киног нээлтээ хийсний дараа 20 өдрийн дотор 4 сая хүн үзсэн бөгөөд 3-н долоо хоногийн турш Box office-г тэргүүлсэн юм. Мөн боловсролын байгууллагаас уг киног насанд хүрээгүй хүүхдүүдэд үзүүлэхийн тулд киноны хүнд хэсгүүдийг хасаж шинээр хийжээ.
Кинонд 2000 оноос 5 жилийн турш тусгай сургуулийн багш нар сурагчиддаа бэлгийн дарамт үзүүлж байсныг Сөүлээс шилжиж ирсэн багш олж мэдэн олон нийтэд ил болгодог талаар өгүүлдэг аж. Сургуулийн хүүхдүүдийн ихэнх нь сонсголгүй, ярьж чаддаггүй хүүхдүүд байсан бөгөөд сургуулийнхаа дотуур байранд бэлгийн хүчирхийлэлд өртөж байжээ. Тухайн үед хүүхдүүдэд бэлгийн дарамт үзүүлж байсан сургуулийн захирал болон бусад багш нарыг цагдаад өгч шүүх хурал хийсэн ч хэргийн нотлох баримтуудыг үл тоон хүчингүйд тооцон богино хугацааны ял өгснөөс өөр ял оноогоогүй байна.
Хэдийгээр хэрэг нааштай шийдэгдэж чадаагүй ч уг кино гарсны дараа хэргийг дахин сөхөж сургуулийн захиралд 12 жилийн хорих ял оноосон байна. Хүчирхийлэл үйлдсэн сургуулийн захирлыг 18 настай охиныг өрөөндөө хүлж бэлгийн хүчирхийлэл үйлдсэн хэмээн ялласан аж. Мөн тус кино нь олонд хүрснээр Солонгос улс хөгжлийн бэрхшээлтэй иргэдийн хүчирхийллийн эсрэг хуулиа улам чангатгасан юм.