“BTS” хамтлагийнхан Сөүл хотыг танилцуулна

0
101

СӨҮЛ. /Yonhap/. БНСУ-ын нийслэл Сөүл хотын үзэсгэлэнт газруудыг танилцуулж буй “BTS” хамтлагийн гишүүдийн сурталчилгааны дүрс бичлэгийг энэ долоо хоногт шууд дамжуулан үзүүлнэ гэж тус хотын засаг захиргаа өнөөдөр мэдээллээ.

“Энэхүү бичлэг нь Сөүлээр аялах, соёлтой танилцах сонирхлыг төрүүлж, цар тахал намжих үед “шүтэн бишрэгчдийн зорих газруудын жагсаалтад тус хотыг багтаах” зорилготой юм” гэж хотын засаг захиргаа коронавирусний халдвар дэлхий дахины аялал жуулчлалын салбарт нөлөөлж буй энэ үед мэдээлсэн байна.

Үзэгчид бичлэгийг үзэх үед нийслэл хотоор аялаж буй мэт мэдрэмж төрөх бөгөөд хамтлагийн гишүүн тус бүр хотын өөр өөр газруудыг танилцуулна. Энэхүү сурталчилгааг орон нутгийн цагаар баасан гаргийн оройны 17 цагаас эхлэн “www.visitseoul.net” цахим хуудас болон нийгмийн сүлжээний сувгуудаас үзэх боломжтой ажээ.

“Бид цаашид өөр олон арга хэмжээг зохион байгуулна” гэж хотын засаг захиргаанаас мэдээлжээ. “BTS” нь 2017 оноос хойш Сөүл хотын аялал жуулчлалын хүндэт элчийн үүргийг гүйцэтгэж байгаа ажээ.

Эх сурвалж: Montsame.mn

Сэтгэгдэл үлдээх