БНСУ-д халдварын шинэ тохиолдлын тоо хоёр өдөр дараалан 600 давжээ

0
89

СӨҮЛ. /Yonhap/. БНСУ-д сүүлийн 24 цагийн хугацаанд “COVID-19” халдварын 621 тохиолдол шинээр илэрснээр коронавирусээр халдварласан хүний тоо сүүлийн хоёр өдөр дараалан 600-гаас олноор нэмэгджээ.

БНСУ-ын Өвчинд хяналт тавих, урьдчилан сэргийлэх төвийн мэдээлснээр, шинээр илэрсэн тохиолдлуудын 590 нь дотоодод халдварлажээ. Ингэснээр тус улсад халдвар авсан хүний нийт тоо 85567-д хүрсэн байна.

Өнгөрсөн пүрэв гаргаас баярын амралт эхэлсэнтэй холбоотойгоор коронавирусний цөөн шинжилгээ хийсэн хугацаанд буюу бямба гаргаас даваа гаргийн хооронд өдөрт халдварын 300 гаруй тохиолдол илэрчээ.

Харин мягмар гарагт халдварын тохиолдлын тоо дахин нэмэгдэж 457-д хүрсэн бол лхагва гарагт 621 тохиолдол илэрсэн нь сүүлийн сар гаруйн хугацаанд өдөрт бүртгэгдсэн хамгийн өндөр үзүүлэлт болжээ.

Эрүүл мэндийн байгууллагын мэргэжилтнүүд халдварын тохиолдлын тоо ийнхүү нэмэгдэж буй нь шинжилгээний тоог нэмэгдүүлсэнтэй холбоотой юу, халдвар дахин тархаж эхэлснийг харуулж байна уу гэдгийг тогтоохоор ажиллаж байгаа аж.

БНСУ-д лхагва гаргийн байдлаар “COVID-19”-өөр халдварласан 75896 хүн эдгэрч, 1544 хүн нас баржээ.

Эх сурвалж: Montsame.mn

Сэтгэгдэл үлдээх