Өнөөдөр Хойд Солонгост “Нарны баяр” тохиож байна

0
77
Өнөөдөр Хойд Солонгосын “Нарны баяр”-ын өдөр
————————————-
БНАСАУ-ын үндэслэн байгуулагч, Солонгосын хөдөлмөрийн намын дарга, Солонгосын ард түмний жолоодогч Ким Ир Сен 1912 оны 4 сарын 15-ны энэ өдөр мэндэлжээ. Ким Ир Сен Японы түрэмгийллийн эсрэг тэмцэлд ард түмнээ манлайлж ялалт байгуулж чадсан бөгөөд 1948 онд БНАСАУ-ыг үндэслэн байгуулж нас барах хүртлээ удирдагчаар ажилласан хүн юм. Тэрээр 1942 – 1972 онд тус улсын ерөнхий сайд, 1972 – 1994 онд ерөнхийлөгчөөр ажиллаж байсан бөгөөд БНАСАУ-ын Хөдөлмөрийн Намын Ерөнхий Нарийн Бичгийн даргын албан тушаалыг хавсран гүйцэтгэж байв. Ким Ир Сен Эх орноо өөрийн хүчинд тулгуурлан хөгжүүлэх тухай Жүчэ үзэл санааг боловсруулсан бол түүний хүү Ким Жон Ил гадны их гүрнүүдийн дарамт шахалтаас цэрэг зэвсгийн хүчээр Эх орноо хамгаалах тухай Сонгун хэмээх номлолыг боловсруулан улс орноо их хямралыг даван туулж энэ бодлого одоо хэрэгжсээр байна. 1994 оны 7-р сард Ким ИР Сен нас баржээ. 1997 онд БНАСАУ-ын Засгийн газрын тогтоолоор Ким Ир Сен удирдагч мэндэлсний 1912 оныг Жүчэ он тооллын 1-р он гэж хэрэглэхээр болжээ. 2021 он бол Жүчэ 110 он юм байна.
1997 онд Ким Ир Сен даргын гавьяаг улам алдаршуулахын тулд БНАСАУ-ын үндэсний хамгийн том баяр бүюу Нарны баяр гэж тэмдэглэхээр болж Нарын баярыг Олон улсын найрамдлын хамгийн том урлаг соёлын наадам болгож ОУын байгууллагуудад бүртгүүлж 2 жилд нэг удаа зохион байгуулахаар болжээ. 2018 онд 31-дэх наадам болсон ба 2020 онд Ковид-19-ээс болж цуцлагдсан байна. Монголын бүх цэргийн чуулга, цирк, дуучид, бүжигчид, рок поп урлагийн олон уран бүтээлчид олон удаа энэ наадамд оролцож Гран при болон 1-р байранд шалгарч байсан түүхтэй бөгөөд БНАСАУ-ын ард түмний дунд Монголын уран бүтээлчид Солонгос дууг маш сайн дуулдаг хэмээн сайшаан хүлээн авдаг билээ. Энэ өдөр БНАСАУ-ын ард түмэн нийтээрээ их удирдагч Ким Ир Сений хөшөөнд амьд цэцгийн баглаа өргөж Жүчэ үзэл санаа болон эх орноо магтан дуулсан соёл, урлаг, спортын олон арга хэмжээнд оролцож бүх нийтийн өргөн зугаалга болдог байна.
Ким Ир Сен удирдагч Монгол – БНАСАУ-ын найрамдалт харилцааг үндэслэн хөгжүүлэгч улс төрийн удирдагч байлаа. 1948 онд БНМАУ-тай дипломат харилцаа тогтоох санаачилга гаргасан анхны улс БНАСАУ байсан төдийгүй БНМАУ-д 2 удаа төрийн айлчлал хийж дэлхий дахинд 2 улсын найрамдалт харилцааг сурталчилж зоримог дипломат арга хэмжээ авч байсан ухаалаг улс төрийн зүтгэлтэн байлаа.
Энэ хямралт цаг үед БНАСАУ-ыг хүний эрхийг бүдүүлгээр зөрчдөг, эдийн засаг соёлын хувьд хамгийн хоцрогдсон, харанхуй бүдүүлэг, мэдээлэл хомс улс гүрэн үздэг ч мэдлэгийн эдийн засаг, зэвсэглэлийг Их гүрнүүдийн хэмжээнд хөгжүүлж чадсан баллистик пуужинтай, цөмийн зэвсэгтэй, олон улсын хэмжээнд Их гүрнүүдийн удирдагчидтай эрх тэгш харилцах чадвартай, мэдээллийн систем, компютерийн технологи, хими, нанотехнологи зэрэг мэдлэгийн салбарыг өндөр хөгжүүлж чадсан хүчирхэг улс гэдгээ хүлээн зөвшөөрүүлсэн үндэс суурийг БНАСАУ-ын жолоодогч Ким Ир Сен зөв тавьж өгч залгамжлагчдаа амжилттай өвлүүлжээ. 30 жил үргэлжилж байгаа БНАСАУ-д авч хэрэгжүүлж байгаа эдийн засгийн хориг арга хэмжээ Ковид цар тахлын үед сулрах байтугай үргэлжилсээр байгаа нь хамгийн эмгэнэлтэй.

Сэтгэгдэл үлдээх