БНСУ-ын Ерөнхийлөгч коронавирусний вакцины хоёр дахь тунг хийлгэжээ

0
106

СӨҮЛ. /TASS/. БНСУ-ын Ерөнхийлөгч Мүн Жэ Ин коронавирусний вакцины хоёр дахь тунг өнөөдөр хийлгэжээ. Тэрбээр “AstraZeneca” компанийн вакциныг тариулсан юм.

БНСУ-ын төрийн тэргүүн тавдугаар сүүлчээр Вашингтонд айлчилж, АНУ-ын Ерөнхийлөгч Жо Байдентай уулзахаар төлөвлөж байгаатай холбогдуулан вакцины хоёр дахь тунг хугацаанаас нь өмнө хийлгэлээ гэж тус улсын Ерөнхийлөгчийн тамгын газар мэдээлсэн байна.

Мүн Жэ Ин коронавирусний вакцины эхний тунг гуравдугаар сарын 23-нд хийлгэсэн бөгөөд хоёр дахь тунг тавдугаар сард хийлгэх ёстой байжээ. Зааврын дагуу “AstraZeneca”-гийн вакцины хоёр дахь тунг эхний тунг хийснээс 8-12 долоо хоногийн дараа хийх ёстой боловч яаралтай шаардлагатай тохиолдолд энэ хугацааг богиносгож болох аж.

БНСУ-д коронавирусний вакцинжуулалт хоёрдугаар сарын 26-нд эхэлсэн бөгөөд тус улсын эрх баригчид дөрөвдүгээр сарын эцэс гэхэд дор хаяж 3 сая, зургаадугаар сарын эцэс гэхэд дор хаяж 12 сая хүнийг вакцинжуулахаар төлөвлөж байгаагаа өмнө нь мэдэгдсэн юм.

Эх сурвалж: Montsame.mn

Сэтгэгдэл үлдээх