БНСУ-ын Халдварт өвчин судлалын төвийн мэдэгдэл

0
64

Гамшгийн аюулаас урьдчилан сэргийлэх төв штаб /11.00 цаг/,

Халдварт өвчин судлалын төвийн /14:00 цаг/ ээлжит мэдээлэл

Иргэд хоорондоо зай барьж харилцах зөвлөмжийн хэрэгжилтийн талаар-Гамшгийн  аюулаас урьдчилан сэргийлэх төв штабаас иргэд харилцахдаа “зай барих” (social distancing) зөвлөмжийн Сөүл хот, Инчон хот, Гёнги, Ганвон муж дах хэрэгжилтийн байдалтай танилцав. Үүнд эдгээр хот, мужид хэсэг бүлгээр халдвар авах эрсдэл өндөр шашны байгууллага, спорт заал, бар цэнгээний газрууд Засгийн газрын чиглэлийг хэрэгжүүлж буй эсэх талаар газар дээр нь танилцаж, цаашид авах арга хэмжээг хэлэлцэв. Улсын хэмжээнд нийт 45420 сүмээс 26104 (57.5%) нь цугларалтаа зогсоож, мөргөлийн үйл ажиллагааг цахим хэлбэрээр явуулсан байна. Үлдсэн 40 гаруй хувь нь холбогдох журам, зааврын шаардлагыг хангасны үндсэн дээр үйл ажиллагаа явуулж байна. Ерөнхий сайд, төв штабын дарга Чөн Сэ Гюн 3 дугаар сарын 22-ноос 4 дүгээр сарын 5 хүртэл 15 хоногийн хугацаанд иргэд хоорондоо зай барьж харилцах хэм хэмжээг хэвшүүлэх, энэ талаар орон нутгийн засаг захиргаанаас хэрэгжилтийг хангаж, хяналт тавьж ажиллахыг үүрэг болгосон.

Европын холбооны улсуудаас Солонгост ирж буй зорчигчдын хорио цээрийн нөхцөл байдлын талаар-Засгийн газар 3 дугаар сарын 22-ноос эхлэн Европын холбооны улсуудаас ирж буй гадаад, дотоодын иргэн бүх зорчигчдыг коронавирусын халдварын шинжилгээнд хамруулж байгаа ба хариу сөрөг гарсан ч гэсэн 14 хоног гэрийн тусгаарлалтад оруулж байна. 3 дугаар сарын 22-ны байдлаар улсын хэмжээнд нийт 9798 зорчигчийг тусгай журмаар хилээр шалган нэвтрүүлээд байна. 22-нд Европын холбооны улсуудаас 6 нислэгээр ирсэн 1442 зорчигчоос 152 хүн халдварын шинж тэмдэг илэрсэн тул Инчоны олон улсын нисэх буудлын тусгаарлах байранд шилжүүлж нарийвчилсан шинжилгээ авсан. Халдварын шинж тэмдэг илрээгүй үлдсэн 1290 зорчигчийг түр байрлах төвд байрлуулж мөн шинжилгээнд хамруулсан бөгөөд 3 дугаар сарын 21-ний 19 цагийн байдлаар сөрөг хариу гарсан 6 зорчигчийг гэрт явуулж ажиглалтад аваад байна. Бусад хүмүүсийн шинжилгээний хариу хүлээгдэж байгаа бөгөөд сөрөг хариу гарсан ч гэртээ өөрийгөө тусгаарлаж хяналтад орно. Халдвар авсан нь шинжилгээгээр тогтоогдсон боловч хөнгөн зэргийн шинж тэмдэгтэй бол Түр эмчилгээний төвд шилжүүлжх, харин биеийн байдал нь хүнд байвал эмнэлэгт хэвтүүлэх чиглэлийг барьж ажиллаж байна.

Засгийн газрын тойм мэдээллийг цахимаар хийнэ- Улс даяар өвчний халдвар дахин дэгдэж болзошгүй тул 3 дугаар сарын 22-ноос 4 дүгээр сарын 5-ны хооронд 15 хоногийн хугацааг онцгой арга хэмжээний хугацаа гэж иргэдэд анхааруулсантай холбогдуулан Гамшгийн  аюулаас урьдчилан сэргийлэх төв штабаас өдөр тутмын ээлжит мэдээллийг цахимаар явуулж байна. Асуултыг мөн цахимаар хүлээж авч буй.

Сөүл хотын Гүру дүүргийн мэдээлэл дуудлагын төвийн ажилчдаас 4 хүн нэмж халдвар авсан. 3 дугаар сарын 8-наас хойш ѳнѳѳдрийг хүртэл 156 иргэн халдвар авсан байна. Гёнги мужийн Соннам хотын Ынхэ Ган сүмд 3 дугаар сарын 9-нөөс өнөөдрийг хүртэл 70 иргэн нэмж халдвар авсан бөгөөд холбогдох хяналт, шалгалтын ажил явагдаж байна. Дэгү хотод халдварын өндөр эрсдэлтэй асрамжийн газар зэрэг нийгмийн хамгааллын байгууллагуудад хийсэн шалгалтын ажил бүрэн дууссан.

БНСУ-ын Халдварт өвчин судлалын төв http://ncov.mohw.go.kr/

Эх сурвалж: Монгол улсаас БНСУ-д суугаа ЭСЯ

Сэтгэгдэл үлдээх