Тусгаарлалтын журмыг зөрчвөл 1 жил хүртэлх хорих ял онооно

0
60

БНСУ-ын хилээр нэвтрэхдээ халууны эм уух, халдварын шинж тэмдгээ нууж худал мэдэгдсэн тохиолдолд Халдварт өвчнөөс сэргийлэх газар хатуу арга хэмжээ авч шийтгэхээ мэдэгдлээ. Мөн өөрийгөө тусгаарлах журмыг зөрчвөл өгөх ялыг чангатгажээ.

Бусан хотын 18 настай иргэн АНУ-д сурч байгаад өнгөрсөн сард Инчоны олон улсын нисэх онгоцны буудлаар дамжин Солонгост ирсэн байна. Тэрээр халуурах гэх мэт өвчний шинж тэмдгүүд илэрч байсан ч, АНУ-с гарахдаа халууны эм ихээр ууж бүх хилийн эрүүл мэндийн шалгалтыг амжилттай давж чаджээ. Мөн эрүүл мэндийн асуулгад ч худал мэдээлэл бичсэн байна. Улмаар Солонгост ирсний дараа 26-ны өдөр коронавирусийн халдвар авсан нь илэрсэн хэрэг гарсан.

Одоогийн байдлаар хорио цээрийн шалгалтад худал мэдүүлэг өгсөн тохиолдолд 1 жил хүртэлх хорих ял болон 10 сая вон хүртэлх торгууль ногдуулах аж. Түүнчлэн БНСУ-д хилээр орж ирээд өөрийгөө тусгаарлах ёстой хүмүүс журмыг зөрчсөн тохиолдолд ч ял шийтгэлтэй.

Цаашдаа тусгаарлалтад байгаа иргэдийн байршлыг нарийвчлан хянаж, Эрүүл мэндийн байгууллага тухайн иргэний оршин байгаа газрын захиргаатай хамтран 3 давхар хяналтаар 24 цагийн турш байгаа газраасаа гарч байгаа эсэхийг хянаж шалгана. Мөн тусгаарлагдсан иргэн гар утсаа орхиж гарахаас сэргийлэн гэнэтийн шалгалт хийх аж.

Хэрэв байх ёстой газраасаа гарвал тэр даруйд нь өвчнөөс сэргийлэх бүх зардлыг төлүүлэх ба улсаас өгч байгаа яаралтай тусламжийн мөнгө тэтгэмжээс хасна.

Ж.Нармандах, 2020.04.07, Солонгос улс.

Сэтгэгдэл үлдээх