БНАСАУ-ын удирдагч улс төрийн товчооны хуралд оролцжээ

0
44

ПЁНЬЯН. /NHK/. БНАСАУ-ын удирдагч Ким Жөн Ун коронавирусний халдвартай тэмцэх чиглэлд нэмэлт арга хэмжээнүүдийг авч хэрэгжүүлэх талаар хэлэлцэхээр эрх баригч Хөдөлмөрийн намын улс төрийн товчооны хуралд оролцсон гэж тус улсын төв мэдээллийн агентлаг өнөөдөр мэдээллээ.

Хөдөлмөрийн намын харьяа “Rodong Sinmun” сонины ням гаргийн дугаарт мэдээлснээр, улс төрийн товчооны хурал бямба гарагт болжээ. Хурлын үеэр улс орны нөхцөл байдал маш тогтвортой байгааг тэмдэглээд, эрх баригчид “өндөр зэрэглэлийн” хатуу арга хэмжээнүүдийг хэрэгжүүлснийг онцолсон байна. Мөн хуралд оролцогчид дэлхий даяар тархсан цар тахлыг ялан дийлэхийн тулд нэмэлт арга хэмжээнүүдийг авах тухай тогтоол баталжээ.

“Rodong Sinmun” сонинд мэдээлснээр, Ким Жөн Ун мөн агаарын цэргийн хүчний ангид шалгалт хийжээ. Өнгөрсөн гуравдугаар сараас хойш Ким Жөн Уны хийсэн цэргийн шалгалтын талаар тус улсын хэвлэл мэдээллийн хэрэгслүүд тогтмол мэдээлэх болсон байна.

Ардын их хурлын чуулган баасан гарагт болно гэж БНАСАУ өмнө нь мэдээлсэн боловч дээрх мэдээнд уг чуулган болсон эсэх талаар дурдаагүй байна. БНАСАУ-д халдварын тохиолдол бүртгэгдээгүй гэж Пёньян мэдэгдсэн хэвээр байгаа юм. БНАСАУ цар тахлын үед чуулганаа зохион байгуулах эсэхэд мэргэжилтнүүд ихээхэн анхаарал хандуулж байгаа ажээ.

Эх сурвалж: montsame.mn

Сэтгэгдэл үлдээх