Ким Жөн Уны биеийн байдал муудсан гэх мэдээллийг АНУ шалгаж байна

0
50

МОСКВА. /RIA Novosti/. БНАСАУ-ын удирдагч Ким Жөн Ун мэс засал хийлгэсний дараа биеийн байдал нь муудсан гэх тагнуулын мэдээг АНУ-ын эрх баригчид шалгаж байна гэж “CNN” телевиз эх сурвалжуудын мэдээллээс иш татан уламжилжээ.

Ким Жөн Ун зүрхний мэс засал хийлгэсэн бөгөөд одоо курс эмчилгээ хийлгэж байгаа гэж Өмнөд Солонгосын “Daily NK”  хэмээх интернэт сонин Умард Солонгос дахь эх сурвалжийнхаа мэдээллээс иш татан мэдээлжээ. Эх сурвалжийн хэлснээр, БНАСАУ-ын удирдагч Пёньян хотоос зүүн хойд зүгт 100 км зайтай орших Мёхянсан уулын орчимд байдаг зусланд эмчилгээ хийлгэж байгаа аж. Дөрөвдүгээр сарын 12-нд нийслэл хотын эмнэлгийн мэс заслын шилдэг эмч нарыг энэ зуслангаас холгүй оршдог, БНАСАУ-ын дээд удирдлагад зориулсан тусгай эмнэлэгт дуудсан байна. Шаардлагатай арга хэмжээг авсны дараа удирдагчийн бие сайжирч эхэлсэн бөгөөд эмч нарын ихэнхийг дөрөвдүгээр сарын 19-нд буцаажээ. Одоо эмч нар мэс заслын дараах нөхөн сэргээх эмчилгээний явцыг ажиглаж байгаа гэж эх сурвалж хэлсэн байна.

Эх сурвалжийн мэдээлж байгаагаар, Ким Жөн Уны одоо байгаа зусланг хувийн хамгаалалтын албаны 30 гаруй цэрэг, мөн Пёньяны харуул хамгаалалтын нэгдүгээр газрын олон ажилтан хамгаалж байгаа аж. Голдуу ийм байгууламжуудыг хамгаалдаг харуулын цэргүүдийг хамгаалалтын бүрэлдэхүүнээс хассан байна.

БНАСАУ-ын удирдагчийн бие 2019 оны наймдугаар сараас хойш тааруу байсан бөгөөд Пэктусан ууланд хэд хэдэн удаа гарсны дараа биеийн байдал нь муудсан гэж эх сурвалж хэлжээ.

Ким Жөн Ун энэ сарын 15-нд БНАСАУ-ыг үүсгэн байгуулагч Ким Ир Сений мэндэлсэн өдрийг тохиолдуулан тус улсын удирдлагын төлөөлөгчид оролцдог ёслолд анх удаа оролцоогүй бөгөөд үүнтэй холбоотойгоор түүний биеийн байдал муудсан байж болзошгүй гэх мэдээлэл хэвлэлүүдэд гарсан юм.

Эх сурвалж: montsame.mn

Сэтгэгдэл үлдээх