БНАСАУ-тай залгаа хил хүртэл төмөр зам барих бэлтгэл ажлыг хийж эхэллээ

0
41

СӨҮЛ. /TASS/. Манай улс БНАСАУ-тай залгаа хил хүртэл төмөр зам барих бэлтгэл ажлыг хийж эхэллээ гэж БНСУ-ын Тээврийн сайд Ким Хён Ми хилийн Косон хотод болсон ёслолын ажиллагааны үеэр мэдэгджээ. Энэхүү төмөр замыг цаашид БНАСАУ болон Оросын Транс Сибирийн төмөр замуудтай нэгтгэх төлөвтэй байгаа юм.

“Энэхүү төсөл нь БНСУ-ын тогтвортой хөгжилд хувь нэмрээ оруулаад зогсохгүй хоёр Солонгосын төмөр замын тээврийн салбарт хамтран ажилллах бэлтгэл ажлын чухал алхам болох юм” хэмээн тэрбээр цохон тэмдэглэжээ.

Түүнчлэн Каннын болон Косон хот хооронд 110 км-ын урттай төмөр замыг барих бэлтгэл ажлыг энэ оны сүүлч гэхэд дуусгаж, барилгын ажлыг ирэх онд эхлүүлэхээ Ким Хён Ми мэдэгдсэн байна. Харин Үндэстнээ нэгтэх яамны сайд Ким Ён Чоль мэдэгдэхдээ, 2.3 тэрбум ам.доллар бүхий энэхүү төсөл нь Япон тэнгис буюу Зүүн тэнгисийн эдийн засгийн эвслийг бий болгох боломжийг олгоно гэжээ.

2018 оны дөрөвдүгээр сард хоёр Солонгосын удирдагчид түүхэн дээд хэмжээний уулзалт хийх үеэрээ хамтарсан тунхаглалд гарын үсэг зурсан юм. Энэхүү хамтарсан тунхаглалын гол заалтуудын нэг нь хоёр Солонгосын төмөр замуудыг шинэчлэн сайжруулж, холбох тухай байжээ. Косон хотод болсон ёслолын ажиллагаа нь БНСУ-ын эрх баригчид амлалтаа биелүүлэхэд бэлэн байгааг харуулж байна хэмээн ажиглагчид цохон тэмдэглэжээ.

Эх сурвалж: montsame.mn

Сэтгэгдэл үлдээх