Мүн Жэ Ин: БНАСАУ-тай бодит хамтын ажиллагааг хөгжүүлэхийг эрмэлзэнэ

0
48

СӨҮЛ. /Yonhap/. Манай Засгийн газар олон улсын хориг арга хэмжээнүүдийг үл харгалзан БНАСАУ-тай бодит хамтын ажиллагааг хөгжүүлэхийг эрмэлзэнэ гэж БНСУ-ын Ерөнхийлөгч Мүн Жэ Ин өнөөдөр мэдэгдлээ. Мөн тэрбээр коронавирусний халдвараас үүдэлтэй хямрал хоёр талын түншлэлийн харилцаанд шинэ боломжийг олгож магадгүй гэж хэлжээ.

Мүн Жэ Ин БНАСАУ-ын удирдагч Ким Жөн Унтай Панмүнжом тосгонд уулзсаны хоёр жилийн ой тохиож буй энэ өдөр Хөх ордны төлөөлөгчидтэй уулзах үеэрээ ийнхүү мэдэгджээ. Панмүнжомын тунхаглалаас хойш бага ахиц дэвшил гарсныг хоёр Солонгос үүрэг амлалтаа биелүүлэхэд дутуу дулимаг хүчин чармайлт гаргасан гэж үзэхээс илүүтэйгээр олон улсын хориг арга хэмжээнүүдийг даван туулахад хүндрэл учирсантай холбоотой юм гэж тэрбээр мэдэгджээ.

“Бид нөхцөл байдал сайжрахыг хүлээгээд байж болохгүй. Бид бага ч атугай зүйлсийг үргэлжлүүлэн хийсээр байх хэрэгтэй” гэж БНСУ-ын Ерөнхийлөгч хэлээд, “COVID-19”, мал амьтны халдварт өвчин, хил орчмын бүсийн байгалийн гамшигт үзэгдэл, уур амьсгалын өөрчлөлтийн эсрэг хамтран ажиллах боломжтойг онцолжээ. Мөн тэрбээр, хоёр Солонгосыг төмөр замаар дахин холбох төслийн хүрээнд БНСУ-ын тал чадах бүхнээ хийнэ гэж хэлсэн байна.

Эх сурвалж: montsame.mn

Сэтгэгдэл үлдээх