БНСУ-д агуулахад түймэр гарсны улмаас олон хүн амиа алджээ

0
80

СӨҮЛ. /Yonhap/. БНСУ-ын нийслэл Сөүл хотоос зүүн зүгт оршдог Ичеон хотын агуулахад гал түймэр гарсны улмаас 38 хүн амиа алдаж, 10 хүн гэмтжээ. Аврах албаны ажилтнууд эрэн хайх ажиллагааг үргэлжлүүлж байна.

Сөүл хотоос зүүн урагш зүгт 50 километр зайд оршдог Ичеонд баригдаж байсан дөрвөн давхар барилгад лхагва гарагт гарсан гал түймрийг таван цагийн дараа унтраасан байна.

Амиа алдсан хүмүүсийн дийлэнх нь барилгын ажилчид байжээ. Өнөө өглөөний байдлаар, гэмтсэн хүмүүсийн наймынх нь биеийн байдал хүнд байгаа бол хоёр нь хөнгөн гэмтэл авчээ.

“DRAM” чипийн үйлдвэрлэлээрээ дэлхийд хоёрдугаарт бичигддэг “SK hynix” компани байрладаг Ичеонд жижиглэн худалдааны агуулахууд олон байдаг ажээ.

Цагдаагийн газар, Гал түймэртэй тэмцэх газар, Шүүхийн шинжилгээний газрын мэргэжилтнүүд гал түймэр гарсан шалтгааныг тогтоохоор хамтарсан мөрдөн шалгах ажиллагаа явуулахаар төлөвлөж байна. Мэргэжилтнүүдийн урьдчилан таамаглаж буйгаар, цахилгаан шат сууриулуулах үеэр гал гарсан байж болзошгүй аж.

Эх сурвалж: montsame.mn

Сэтгэгдэл үлдээх