БНСУ-д клубүүдтэй холбоотой халдварын тохиолдлын тоо 102 болжээ

0
117

СӨҮЛ. /Yonhap/. БНСУ-ын Сөүл хотын Итаевон дүүргийн шөнийн цэнгээний газар, клубүүдээр үйлчлүүлсэн хүмүүсээс коронавирусний халдвар нэмж илэрснээр халдвар авсан хүний нийт тоо мягмар гаргийн өдрийн байдлаар 102 боллоо гэж тус улсын Өвчинд хяналт тавих, урьдчилан сэргийлэх төвөөс мэдээллээ.

Одоогийн байдлаар Сөүлд илэрсэн халдварын хамгийн том голомт энэ болсон бөгөөд өмнө нь Гуро дүүргийн дуудлагын төвтэй холбоотой 98 тохиолдол бүртгэгдэж байсан юм. Клубүүдтэй холбоотой нийт тохиолдлын 64 буюу тэн хагасаас илүү хувь нь Сөүлд бүртгэгдсэн бол 23 нь Гёнги мужид, долоо нь Инчеон хотод, тав нь Умард Чунчён мужид илэрчээ.

Халдвар авсан хүмүүсийг насаар ангилвал, 67 нь 20 гаруй настай, 23 нь 30 гаруй настай бол 40, 50-аад насны хүмүүс тус тус дөрөв, 19-өөс доош настай гурав, 60-аас дээш настай нэг хүн байгаа ажээ. Хүйсээр ангилвал, 92 нь эрэгтэй, 10 нь эмэгтэй байна гэж Өвчинд хяналт тавих, урьдчилан сэргийлэх төвөөс мэдээлжээ.

БНСУ-д даваа гарагт халдварын 27 шинэ тохиолдол бүртгэгдсэнээр нийт халдвар авсан хүний тоо 10936 болжээ. Халдвар тархсан газруудаар үйлчлүүлсэн, шинж тэмдэг илрээгүй юм уу хөнгөн шинж тэмдэг хүмүүсээс олон нийтийн дунд халдвар тархаж болзошгүйд мэргэжилтнүүд ихэд санаа зовниж байна. Эрүүл мэндийн газрын удирдлагууд дөрөвдүгээр сарын сүүлээр, тавдугаар сарын эхээр тэдгээр газраар үйлчлүүлсэн хүмүүсийг сайн дураараа шинжилгээ өгөхийг уриалж байгаа ажээ.

Өнөөдрийн байдлаар клубүүдтэй ямар нэгэн байдлаар холбоотой 10300 гаруй хүнд шинжилгээ хийсэн бөгөөд тэдний 8490 нь халдвар тархсан газрууд руу орохдоо бүртгүүлсэн хүмүүс бол үлдсэн нь сайн дураараа шинжилгээнд хамрагджээ. Гэсэн хэдий ч зарим хүмүүс буруу мэдээлэл өгсөнтэй холбоотойгоор бүх хүнийг илрүүлэхэд хүндрэл учраад байгаа бөгөөд 2000-2500 хүний мэдээлэл тодорхойгүй байгаа юм байна.

Сөүл хотын захирагч Пак Вон Соны мэдээлснээр, хотын удирдлага үүрэн холбоотой операторуудын мэдээлэлд тулгуурлан халдвар тархсан газруудаар үйлчлүүлсэн 10905 хүний жагсаалтыг гаргаж, тэдэн рүү шинжилгээ өгөхийг хүссэн зурвас илгээжээ. Мөн картаар гүйлгээ хийсэн 494 хүний жагсаалтыг гаргажээ. Түүнчлэн Засгийн газар нэрээ нууцлан шинжилгээ өгөх боломжийг бүрдүүлснээс хойш шинжилгээнд хамрагдсан хүний тоо хоёр дахин нэмэгджээ.

БНСУ-ын бусад хотын засаг захиргаад халдвар авсан байж болзошгүй хүмүүсийг илрүүлэх, тусгаарлах, мөн халдвар нэмж тархахаас урьдчилан сэргийлэхийн тулд цэнгээний газруудын үйл ажиллагааг түр хугацаагаар зогсоожээ. Мягмар гаргийн байдлаар Сөүл, Дэгү, Инчеон зэрэг 12 хотын засаг захиргаа ийм шийдвэрийг гаргасан эсвэл гаргахаар төлөвлөөд байгаа ажээ.

Эх сурвалж: montsame.mn

Сэтгэгдэл үлдээх