Тусгаарлалтын дэглэм зөрчсөн таван гадаад иргэнийг албадан нутаг буцаана

0
108

Солонгос улсын хууль зүйн яамнаас коронавирусийн халдварын үед тусгаарлалтаас гарсан таван гадаад иргэнийг нутаг буцаахаар болсноо өнөөдөр/2020.05.22/ мэдэгджээ. Эдгээр иргэд нь Пакистан, Хятад, Польш улсын иргэд аж. Пакистан улсын иргэн Х нь 4-р сарын 27-ны өдөр тусгаарлагдаж байсан байрнаасаа гарч олон нийтийн газраар зорчихоос гадна, байсан байрандаа найзуудыгаа дуудаж хооллосон байна. Харин Хятад улсын иргэн Л нь байрандаа утсаа үлдээн 11 удаа гадагш нууцаар гарчээ. Түүнчлэн Польш болон Хятад улсын иргэд тусгаарлалтаас гарч тамхи татах, эрүүл мэндийн байгууллагаас ирсэн дуудлагыг таслах гэх мэт үйлдэл гаргасан тул эдгээр иргэдийг Солонгос улсын хууль зүйн яамнаас нутаг буцаах тушаал гаргасан байна. Мөн дээрх иргэдээс гадна тусгаарлалтаас гарсан есөн иргэнд хууль зүйн яамнаас торгууль ногдуулжээ. Эдгээр 9-н иргэний тусгаарлалтаас гарах болсон шалтгааныг тодруулахад бие муутай аав дээрээ очих гэж гарсан болон тусгаарлалтад байгаа иргэдэд тараагдсан хүнсний зүйлс аваагүйн улмаас идэх хүнсгүй болж гадагш гарсан зэрэг асуудлаар тусгаарлалтаас гарсныг харгалзан үзэж нутаг буцаах бус торгууль оноохоор болжээ. Одоогоор 4-р сарын 1-ны өдрөөс өнөөг хүртэл нутаг буцсан нийт 24 иргэн байгаа бөгөөд эдгээр иргэдийн 17 нь тусгаарлалтаас гарсан бол 7 нь тусгаарлалтад орохоос татгалзсан байна. Мөн онгоцны буудлаас хоёр долоо хоног тусгаарлагдах журмыг дагаж чадахгүй хэмээн 36 иргэн нутаг буцжээ.

Солонгос мэдээ булан

WWW.MGLRADIO.COM

Сэтгэгдэл үлдээх