БНСУ-д өдөрт бүртгэгдсэн халдварын тохиолдлын тоо 40-өөс буурчээ

0
103

СӨҮЛ. /Yonhap/. БНСУ-д баасан гарагт коронавирусний халдварын 39 шинэ тохиолдол бүртгэгдсэнээр нийт халдвар авсан хүний тоо 11441 болжээ. Шинээр илэрсэн тохиолдлуудын 27 нь дотоодод халдварлажээ.

Эмнэлгийн байгууллагын мэргэжилтнүүд Сөүл хотоос баруун зүгт оршдог Бучеон хотод байрладаг цахим худалдааны тэргүүлэгч компанийн хүргэлтийн төвийн халдварын голомтыг хяналтад авах, вирус дахин тархахаас урьдчилан сэргийлэх арга хэмжээнүүдийг хэрэгжүүлж байгаа ажээ.

БНСУ-д пүрэв гарагт халдварын шинэ тохиолдлын тоо 79-д хүрсэн нь сүүлийн хоёр сар орчмын хугацаанд өдөрт бүртгэгдсэн хамгийн олон тохиолдол болсон хэдий ч эрх баригчид хүргэлтийн төвд тархалтыг хяналтад авахын тулд ихээхэн хүчин чармайлт гаргаснаар халдварын тохиолдлын тоо ийнхүү буурчээ.

Бямба гаргийн үдийн байдлаар “Coupang” компанийн хүргэлтийн төвтэй холбоотой халдварын 102 тохиолдол бүртгэгдсэн байна. Уг төвд халдварын анхны тохиолдол өнгөрсөн долоо хоногт бүртгэгдсэн юм.

БНСУ-д энэ долоо хоногийн эхээр халдварын тохиолдлын тоо огцом нэмэгдсэнтэй холбоотойгоор эрх баригчид хүн ам шигүү суурьшдаг Сөүл болон тус хотын эргэн тойрны бүс нутгийн оршин суугчдад зургадугаар сарын 14 хүртэл зайнаас харилцах хатуу дүрмийг баримтлахыг уриалжээ.

БНСУ-д энэ сарын 29-ний байдлаар халдвар авсан 10398 хүн эдгэрч, 269 хүн нас барсан байна.

Эх сурвалж: Montsame.mn

Сэтгэгдэл үлдээх