БНСУ-д өдөрт бүртгэгдсэн халдварын тохиолдлын тоо 40-өөс буурчээ

0
308

СӨҮЛ. /Yonhap/. БНСУ-д ням гарагт коронавирусний халдварын 38 шинэ тохиолдол бүртгэгдсэнээр нийт халдвар авсан хүний тоо 11814 болсон гэж Солонгосын Өвчинд хяналт тавих, урьдчилан сэргийлэх төв өнөө өглөө мэдээллээ.

БНСУ-д өдөрт бүртгэгдсэн халдварын тохиолдлын тоо хоёр өдөр дараалан 50-иас давсны дараа ийнхүү буурсан нь энэ юм. Шинэ тохиолдлуудын 33 нь дотоодод халдварласан бөгөөд бүгд Сөүл хотын бүсэд бүртгэгджээ.

Зайнаас харилцах дүрмийг тавдугаар сарын 6-наас сулруулсан БНСУ-д шашны цуглаан, шөнийн клуб, хүргэлтийн төвтэй холбоотой халдварын олон тохиолдол бүртгэгдсэн юм. Амралтын өдрүүдэд хаалганаас хаалганд хүргэх үйлчилгээ болон спортын төвтэй холбоотой халдварын тохиолдлууд илэрсэн байна.

Ням гаргийн байдлаар “Coupang” цахим худалдааны компанийн хүргэлтийн төвтэй холбоотой халдварын 133 тохиолдол, Инчеон хот, Гёнги мужийн жижиг сүмүүдтэй холбоотой 82 тохиолдол бүртгэгдсэн бол хаалганаас хаалганд хүргэх үйлчилгээтэй холбоотой 45, ширээний теннисийн төвтэй холбоотой 17 тохиолдол тус тус илэрчээ.

Мөн ням гарагт ахлах сургуулийн нэгэн сурагчаас халдвар илэрсэн байна. Уг сурагч  “Lotte World” хүрээлэнд баасан гарагт очсон тул уг хүрээлэнг бямба гарагт хаажээ. Түүнчлэн бүх сурагч, багшид шинжилгээ хийх хүртэл түүний сурдаг сургуулийн сургалтыг түр зогсоосон байна.

Өвчинд хяналт тавих, урьдчилан сэргийлэх төв халдварын шинж тэмдэггүй, “чимээгүй” халдвар тээгчид нь томоохон асуудлуудын нэг болсныг тэмдэглээд, шинжилгээний хариу нь эерэг гарсан өвчтөнүүдийн 25-35 хувь нь халдварын ямар нэгэн шинж тэмдэггүй байгааг мэдээлжээ.

БНСУ-д тавдугаар сарын 20-ноос цэцэрлэг, бага, дунд, ахлах сургуулийг үе шаттайгаар нээж эхэлсэн бөгөөд өнөөдрөөс бүх сурагч хичээлдээ явж эхэлжээ. Гэсэн хэдий ч халдварын тархалтын улмаас 20900 сургууль сургалтаа эхлүүлэх хугацаагаа хойшлуулсан байна.

Сургуулиуд сурагчдыг тусдаа хооллуулах, цахим болон танхимын сургалтыг хослуулах зэргээр үйл ажиллагаагаа үргэлжлүүлэн явуулах ажээ. Эцэг эх, багш нарын хувьд зуны улирал болж байгаа тул амны хаалт зүүх зэрэг эрүүл ахуйн дүрмүүдийг баримтлахад хүндрэл учирч болзошгүйд санаа зовниж байгаа юм байна.

БНСУ-д өдөрт бүртгэгдсэн халдварын тохиолдлын тоо тавдугаар сарын 2-нд хоёрт хүрч буурсан боловч түүнээс хойш өсөж, буурсаар, тавдугаар сарын 28-нд 79-д хүрсэн нь тухайн сардаа бүртгэгдсэн хамгийн өндөр үзүүлэлт болжээ. Тус улсад энэ сарын 7-ны байдлаар халдвар авсан 10563 хүн эдгэрч, 273 хүн нас баржээ.

Эх сурвалж: Montsame.mn

Сэтгэгдэл үлдээх