БНСУ Солонгос хоорондын хэлэлцээрийг дагаж мөрдөхийг БНАСАУ-д уриалжээ

0
208

СӨҮЛ. /Yonhap/. “БНСУ-ын эсрэг дараагийн алхмыг хэрэгжүүлнэ” БНАСАУ гэж мэдэгдсэнтэй холбогдуулан БНСУ-ын Үндэстнээ нэгтгэх яам Солонгосын хоорондын хэлэлцээрийг дагаж мөрдөхийг БНАСАУ-д уриалжээ.

“Засгийн газар одоогийн нөхцөл байдалд ихээхэн анхаарал хандуулж байгаа бөгөөд Өмнөд, Умард байгуулсан бүх хэлэлцээрээ дагаж мөрдөх хэрэгтэй” гэж Үндэстнээ нэгтгэх яамнаас сэтгүүлчдэд илгээсэн мэдэгдэлд тэмдэглэсэн байна.

“Пёньян БНСУ-ын эсрэг дараагийн алхмыг хэрэгжүүлнэ. Шаардлагатай арга хэмжээнүүдийг авах зааврыг армид өгсөн” гэж БНАСАУ-ын удирдагч Ким Жөн Уны дүү Ким Ё Жон бямба гарагт мэдэгдсэнтэй холбогдуулан дээрх мэдэгдлийг хийжээ.

Ким Ё Жон ямар арга хэмжээ хэрэгжүүлэх талаар дэлгэрэнгүй мэдээлээгүй боловч БНСУ үүнийг ойрын ирээдүйд өдөөн хатгалга хийх заналхийлэл гэж үзсэн байна.

БНСУ дахь БНАСАУ-ын дүрвэгчид, консерватив идэвхтнүүд Пёньяны эсрэг ухуулах хуудас илгээсэнтэй холбогдуулан БНАСАУ сүүлийн үед БНСУ-ыг хатуу шүүмжлэх болсон. БНАСАУ өнгөрсөн долоо хоногт БНСУ-ыг “дайсан” хэмээн нэрлээд, Солонгос хооронд харилцаа холбооны бүх шугмаа хаана гэж мэдэгдсэн юм.

Пёньян ухуулах хуудас тараасныг хоёр талын найрамдлын хэлэлцээрийг зөрчсөн үйлдэл хэмээн үзэж байгаа бөгөөд хоёр Солонгосын зохицуулах товчоог хааж, хил дамнасан томоохон хөтөлбөрүүдийг бүрмөсөн зогсооно хэмээн удаа дараа мэдэгдсэний дараа дээрх мэдэгдэл гарчээ.

БНСУ идэвхтнүүдийг ухуулах хуудас тараахыг хориглохыг хуульчлахаа амлаж, уг үйл ажиллагаатай холбоотой хоёр дүрвэгчийн бүлгийн эсрэг эрүүгийн хэрэг үүсгэх хүсэлт гаргасан байна.

Харин БНАСАУ-ын хувьд эдгээр арга хэмжээг оройтуулж авсан гэж үзжээ.

Эх сурвалж: Montsame.mn

Сэтгэгдэл үлдээх