Солонгосын хамгийн алдартай гурван гэмт хэргийн нэг

0
2836

Солонгос улсад болсон бодит явдлаас сэдэвлэсэн алдартай кинонуудыг цувралаар орчуулан хүргэж байгаа билээ. Энэ удаа “Voice Of A Murder” хэмээх бодит явдлаас сэдэвлэсэн киног танилцуулж байна.

Уг кино нь 1991 оны 1 сарын 29-ны өдөр бага ангийн сурагч И Хён Ху(тухайн үед 9-н настай байсан) хэмээх хүүг барьцаалан аминд нь хүрсэн бодит хэргээс сэдэвлэсэн кино аж. Тухайн үед хамгийн сүүлд хүүг тоглоомын талбай дээр байсныг харсан гэрч нар байжээ. Хэрэгтэн хүүгийн аав болох мэдээний алдарт хөтлөгч И Ү Шил руу нийт 50 гаруй сүрдүүлсэн дуудлага хийж, 10 гаруй тэмдэглэл үлдээж, 100 сая вон нэхсэн бөгөөд уг явдал 44 хоногийн турш үргэлжилсэн байна.

Тухайн үед хүүг алга болоход гарсан зурагт хуудас

Уг хэргийг тухайн үед Гангнам хотын цагдаагийн газраас шалгасан бөгөөд хэрэгтнийг барьж болох хэд хэдэн боломжийг алдсан хэмээн иргэдийн уур бухимдлыг багагүй хүргэсэн байна. Мөн хэрэгтэн хүүгийн эцэг эхэд хүүг амьд байгаа хэмээн итгүүлэхийн тулд утсаар хоолойг нь сонсгож байсан хэдий ч цагдаагийн шалгалтын явцад хүүгийн хоолойг дуу хураагчид хуулбарлан эцэг эхэд нь сонсгож байсан нь тодорхой болжээ. Ингээд хүүг амьд эсэхэд эргэлцэж эхэлсэн ба хэрэг гарснаас хойш 43 өдрийн дараа буюу 1991 оны 3-н сарын 13-ны өдөр Хан мөрний ойролцоох усны сувгаас цогцосыг нь олжээ. Хүүгийн цогцост шинжилгээ хийж үзэхэд хэрэг гардаг өдөр буюу 1 сарын 29-ны өдөр нас барсан нь тодорхой болсон бөгөөд хэрэгтэн хүүгийн аминд хүрэхээсээ өмнө дуу хураагчид дууг нь хураан авч хүү нь амьд байгаа хэмээн эцэг эхэд итгүүлэн мөнгө нэхэж байсан ажээ.

Уг хэрэг Солонгос улсад гэмт хэрэгтэн нь илрээгүй алдартай гурван хэргийн нэг ба хэргийг хэлэлцэх хугацаа 2006 оны нэг сард хэдийн дууссан байна. Киноны хувьд 2007 онд нээлтээ хийсэн ба нээлтээ хийсэн даруй 2 сая гаруй хүн үзэж өндөр амжилт үзүүлсэн аж. Мөн хэрэгтний хоолойг Солонгосын хамгийн царайлаг жүжигчдийн нэг гэгддэг Кан Дун Вон оруулсан байна.

Хэрэгтний дууг оруулсан жүжигчин Кан Дун Вон

Түүнчлэн хэрэгтний хоолойг одоог хүртэл интернетээс хайж сонсох боломжтой бөгөөд тухайн үед хүмүүст хэрэгтний хоолойг сонсгохын тулд тусгай дугаар луу залгаж сонсох боломжтой байжээ. Учир нь хэрэгтний хоолойгоос өөр мэдэх зүйл төдийлөн бага тул хүмүүс хэрэгтнийг хоолойгоор нь таньж цагдаад мэдэгдэх боломжтой хэмээн үзсэн байна.

Хэрэгтний бодит хоолой

Солонгос мэдээ булан

WWW.MGLRADIO.COM

 

Сэтгэгдэл үлдээх