БНАСАУ-ын шийдвэрийг БНСУ сайшаажээ

0
806

СӨҮЛ. /TASS/. БНСУ-д чиглэсэн цэргийн ажиллагааг хэрэгжүүлэх төлөвлөгөөгөө БНАСАУ-ын удирдагч Ким Жөн Ун хойшлуулах шийдвэр гаргасныг нь БНСУ магтан сайшааж байна гэж Үндэстнээ нэгтгэх яамны төлөөлөгч сэтгүүлчдэд мэдэгджээ.

“Эгзэгтэй үед Умард Солонгосын төлөвлөгөөгөө түр зогсоох алхмууд нь сайны дохио юм. Хоёр Солонгос харилцаагаа сайжруулж, яриа хэлэлцээний үеэр бүх асуудлыг хэлэлцэж чадна гэж найдаж байна” хэмээн тэрбээр цохон тэмдэглэжээ.

БНАСАУ-ын Төрийн Зөвлөлийн дарга Ким Жөн Ун БНСУ-ын эсрэг чиглэсэн цэргийн ажиллагаа явуулах төлөвлөгөөг хэрэгжүүлэх хугацааг хойшлуулах шийдвэрийг Солонгосын Хөдөлмөрийн намын Цэргийн төв комиссын 5 дугаар чуулганы цахим хэлбэрээр явуулсан урьдчилсан хуралдааны үеэр гаргасныг Солонгосын төв цахилгаан мэдээний агентлаг лхагва гарагт мэдээлсэн юм. Удалгүй БНАСАУ БНСУ-тай залгаа хилийн дагуух өмнө нь суурилуулсан чанга яригчуудаа хураажээ.

Зургадугаар сарын 16-нд БНАСАУ Кэсон хот дахь Солонгос хоорондын хамтарсан төлөөлөгчийн газрыг дэлбэлсэн бөгөөд Өмнөд Солонгосын идэвхтнүүд суртал ухуулгын хуудсууд тараасны хариуд ийм үйлдэл хийсэн гэж мэдэгдсэн билээ. Солонгосын ардын армийн анги нэгтгэлүүдийг Кымгансан, Кэсон орчимд байрлуулах, гэрээний дагуу цэргээ татсан цэрэггүй бүсийн илүү аюултай бүс дэх харуулын байруудын үйл ажиллагааг сэргээх, Өмнөдтэй залгаа хил орчимд бүх төрлийн цэргийн сургуулиа явуулж эхлэхээр төлөвлөж байгаагаа БНАСАУ-ын Ерөнхий штаб мэдэгдсэний дараа хоёр Солонгосын харилцаанд үүссэн хурцадмал байдал улам даамжирсан юм.

Эх сурвалж: Montsame.mn

Сэтгэгдэл үлдээх