БНАСАУ-д Солонгосын дайн эхэлсний ойн өдөр Америкийн эсрэг жагсаал болсонгүй

0
186

СӨҮЛ. /RIA Novosti/. БНАСАУ энэ жил Солонгосын дайн эхэлсний 70 жилийн ойг тохиолдуулан АНУ-ын эсрэг жагсаал зохион байгуулаагүй гэж “Yonhap” агентлаг мэдээлжээ.

Тус агентлагийн мэдээлж буйгаар, БНАСАУ өмнө нь жил бүрийн зургадугаар сарын 25-нд нийслэл Пёньян хотын Ким Ир Сений талбайд Америкийн эсрэг жагсаал зохион байгуулдаг байсан боловч Умард Солонгосын удирдагч Ким Жөн Ун АНУ-ын Ерөнхийлөгч Дональд Трамптай Сингапур, Ханой хотод уулзсаны дараа 2018, 2019 онуудад энэ арга хэмжээг зохион байгуулаагүй байна.

Солонгосын Хөдөлмөрийн намын албан ёсны хэвлэл болох “Нодон Синмун” сонин, Солонгосын төв цахилгаан мэдээний агентлаг /KCNA/ зэрэг Умард Солонгосын хэвлэл мэдээллийн хэрэгслүүд энэ жил дайн эхэлсний ойд зориулан Америкийн эсрэг олон нийтийн арга хэмжээ зохион байгуулсан талаар огт мэдээлээгүй байна.

БНАСАУ-ын эрх баригчид тус улсын Гадаад хэргийн яамны Зэвсэг хураах, энх тайвны хүрээлэнгийн тайланг пүрэв гарагт нийтэлжээ. Уг тайлан илтгэлд Сингапурт болсон АНУ-БНАСАУ-ын дээд хэмжээний уулзалтын дараа Вашингтоны бодлого илүү “түрэмгий” болсон гэж онцлон тэмдэглээд “АНУ-ын зүгээс байнга учирч буй цөмийн аюулыг тогтоон барих хүчийг” улам нэмэгдүүлнэ гэдгийг цохон тэмдэглэжээ.

Солонгосын дайн буюу БНАСАУ /Умард Солонгос/ болон БНСУ-ын /Өмнөд Солонгос/ хооронд болсон зэвсэгт мөргөлдөөн 1950 оны зургадугаар сарын 25-нд эхэлж, 1953 он хүртэл үргэлжилжээ. Энэ дайнд Өмнөд Солонгосыг АНУ ба өрнөдийнхөн, Умард Солонгосыг ЗХУ, БНХАУ зэрэг коммунист орнууд дэмжиж байсан бөгөөд одоог хүртэл албан ёсоор дуусаагүй байгаа билээ.

Эх сурвалж: Montsame.mn

Сэтгэгдэл үлдээх